Tags-Naqab

ye bad-gumānān-e-anjuman 'shād' kis liye jaan kho rahe haiñ
naqāb uThāne ke ba.ad bhī us nigāh meñ barhamī milegī

naqāb chehre se mere haTā rahī hai ġhazal
hisār-e-zāt se bāhar bulā rahī hai ġhazal

aḳhlāq kī naqāb meñ le kar valī kā Dhoñg
nocheñge merī laash ko kitne uqaab aur

be-parda sū-e-vādi-e-majnūñ guzar na kar
har zarra ke naqāb meñ dil be-qarār hai

uTh ai naqāb-e-yār ki baiThe haiñ der se
kitne ġharīb dīda-e-pur-nam liye hue

ġharaz hī kyā thī tamāshā-e-dahr se tum ko
ab aa.e ho to ye ruḳh par naqāb kyā ma.anī

mirī nazar hī se ye ehtiyāt hai varna
naqāb ke liye band-e-naqāb kyā ma.anī

hazār pardoñ meñ ḳhud ko chhupā ke baiTh magar
tujhe kabhī na kabhī be-naqāb kar dūñgā

āshiq naqāb-e-jalva-e-jānāna chāhiye
fānūs-e-sham.a ko par-e-parvāna chāhiye

mujh ko ḳhabar rahī na ruḳh-e-be-naqāb kī
hai ḳhud numūd husn meñ shān-e-hijāb kī

sharāb apnī jagah chāñdnī hai apnī jagah
magar javāb hī kyā husn-e-be-naqāb kā hai

hue haiñ nā-gahāñ bismil sharīk-e-bazm jo sab
qusūr kuchh hai tirā kuchh tire naqāb kā hai

naqāb kahtī hai maiñ parda-e-qayāmat huuñ
agar yaqīn na ho dekh lo uThā ke mujhe

maslahat chāhe rahūñ Daale tasanño kā naqāb
dostī kī maañg chehre par koī parda na ho

tire jalve ko muusā dekhte kyā
naqāb uThne se pahle uḌ ga.e hosh

gar naqāb apnī ulaT de vo ruḳh-e-tābinda se
gir paḌe betāb ho kar charḳh par se āftāb

ruḳh se naqāb un ke sarkā huā hai kuchh kuchh
dīvāna kar na Daale ye nīm-be-hijābī

ab to āñkhoñ par ġham-e-hastī ke parde paḌ ga.e
ab koī husn-e-mujassam be-naqāb aayā to kyā

muñh na khulne par hai vo aalam ki dekhā hī nahīñ
zulf se baḌh kar naqāb us shoḳh ke muñh par khulā

dīdār se pahle hī kyā haal huā dil kā
kyā hogā jo ulTeñge vo ruḳh se naqāb āḳhir