Tags-Nasha

tumhārī yaad nikaltī nahīñ mire dil se
nasha chhalaktā nahīñ hai sharāb se bāhar

nashsha karne kā bahāna ho gayā
jab zarā mausam suhānā ho gayā

koī nashsha na koī ḳhvāb ḳharīd
tīra-baḳhtī hai māhtāb ḳharīd

nigāh-e-nāz kā nashsha kabhī kā TuuT chukā
bas ab to āñkhoñ meñ us kā ḳhumār hai shāyad

dard us kā ubhar rahā hogā
saarā nashsha utar rahā hogā

is darja nasha kab hai ki gumrāh rahūñ maiñ
ye hosh mirā dushman-e-dushvār huā hai

be-nashsha bahak rahā huuñ kab se
dozaḳh huuñ dahak rahā huuñ kab se

duniyā dil-e-ghazal meñ mai-ḳhāna ishq kā hai
har ruuh vajd meñ hai har jism meñ nasha hai

tamām-umr ham apnī anā meñ mast rahe
vo nashsha sab se alag thā jo is sharāb meñ thā

maazī se ubhrīñ vo zinda tasvīreñ
utar gayā sab nashsha na.e purāne kā

āñkheñ niiñd se kyuuñ haiñ bojhal
ġham kā nasha kuchh TuuT rahā hai

zinda rahne kā nashsha hī aisā hai
kitnī bhī ho muddat kam paḌ jaatī hai

bhare makāñ kā bhī apnā nasha hai kyā jaane
sharāb-ḳhāne meñ rāteñ guzārne vaalā

tirī mohabbat meñ gumrahī kā ajab nasha thā
ki tujh tak aate hue ḳhudā tak pahuñch ga.e haiñ

mujhe jab se lagā hai nashsha-e-ġham
mujhe har nashsha halkā lag rahā hai

bhaa.ī bahnoñ kī mohabbat kā nasha mat pochhiye
be-takalluf ho ga.e to gudgudī tak aa ga.e

hameñ jab ḳhuub chaḌh jaatā hai nashsha apnī hastī kā
to us nashshe meñ ham raqs-e-adam bhī karte rahte haiñ

maiñ tum se duur huā huuñ to maslahat hai koī
ye mat samajhnā ki mil ke nasha utarne lagā

nashshe meñ bhī tire 'beḳhud' kī ta.allī na ga.ī
bāda-e-hosh-rubā ko mai-e-kausar jaanā

vo āñkheñ mast aur gulābī us kī ki un ko dekhe to dekhte hī
mai-e-mohabbat kā us kī dil ko ho kyā hī gahrā nasha do-bālā