Tags-Nasha

ḳhudī kā nashsha chaḌhā aap meñ rahā na gayā
ḳhudā bane the 'yagānā' magar banā na gayā

sūraj se us kā nām-o-nasab pūchhtā thā maiñ
utrā nahīñ hai raat kā nashsha abhī talak

ḳhutan ḳhutan thī shalañg-e-ġhazāl mere liye
badan badan mirā nashsha subū subū maiñ thā

ham mai-kashoñ ne nashshe meñ aise kiye savāl
dam band kar diyā sar-e-mimbar-ḳhatīb kā

ḳhudā kā shukr hai nashsha utar gayā merā
ki maiñ subū meñ samundar ulaTne vaalā thā

aahaT ilaaj hai dil-e-vahshat-pasand kā
rakhā namak zabāñ pe ki nashsha utar gayā

aaj tak us kī mohabbat kā nasha taarī hai
phuul baaqī nahīñ ḳhushbū kā safar jaarī hai

chaḌhtā huā parvāz kā nashsha hai aur maiñ
tez havā rah rah kar Dañk chubhotī hai

bahār aa.ī thī chehre pe chaar din ke liye
nasha hai aaj bhī ā.ankhoñ meñ us latāfat kā

tire zavāl kī manzil abhī nahīñ aa.ī
nasha to TuuT chukā ab ḳhumār TūTegā

nashshe meñ jī chāhtā hai bosa-bāzī kījiye
itnī ruḳhsat dījiye banda-navāzī kījiye

mire nashe mujhe ab laḌkhaḌāne mat denā
sharāb-ḳhāne se bāhar nikal rahā huuñ maiñ

dekh ye phuul ye mahtāb na jā
rut meñ ras shab meñ nasha baaqī hai

mai-kada sāġhar surāhī aur sahbā aap haiñ
jo kisī sūrat na utre aisā nashsha aap haiñ

giit surīlā taan anokhī nashshe kā aalam kaif sarāpā
jaise kanhayyā bansī bajā.eñ uf rī javānī haa.e zamāne

ye maanā ham bahakne lag ga.e the
zarā samjho ki ye nashsha nayā hai

ġham-o-ḳhushī bhī to ik nasha hai sambhalnā āsāñ nahīñ hai 'ḳhālid'
binā piye bhī qadam hamāre jo aaj bahke to log samjhe

paa.e ḳhum baiTh ke nashshe meñ vo bāteñ kiije
log samjheñ sar-e-mimbar hai bayān-e-vā.iz

tauba bhī kar lī thī ye bhī nashsha kī thī ik tarañg
aap samjhe the ki 'beḳhud' pārsā ho jā.egā

ye dil hai shauq meñ be-ḳhud vo aañkh nashshe meñ chuur
jhukā na de su-e-sāġhar bhaḌaktī pyaas mujhe