Tags-Nasha

hamārī vaz.a ne pābandiyāñ qubūl na kiiñ
misāl-e-nashsha the ham aur sāġharoñ meñ na the

havā ko bahut sar-kashī kā nasha hai
magar ye na bhūle diyā bhī diyā hai

tamām raat vo pahlū ko garm kartā rahā
kisī kī yaad kā nashsha sharāb jaisā thā

shaam se un ke tasavvur kā nasha thā itnā
niiñd aa.ī hai to āñkhoñ ne burā maanā hai

uns apne meñ kahīñ paayā na begāne meñ thā
kyā nasha hai saarā aalam ek paimāne meñ thā

ruḳh pe bahāreñ jhuum rahī haiñ
aañkh meñ nashsha Dol rahā hai

is vāste mai-ḳhvārī kā ilzām thā mujh par
mujh meñ jo vo ik nashsha sā rahtā thā vo tum the

jiinā vo bhī hosh meñ rah ke mushkil thā
kartā huuñ ab roz nasha so zinda huuñ

kyā patā ham ko milā hai apnā
aur kuchh nashsha chaḌhā hai apnā

nashīlī raat kā nashsha kuchh aur baḌh jaatā
tirā nazārā bhī hotā agar nazāroñ meñ

'saudā' hai be-tarah kā nasha jām-e-ishq meñ
dekhā ki us ko muñh ke lagāne ne kyā kiyā

ajab tilism hai nairañg-e-jāvedānī kā
ki TūTtā hī nahīñ nashsha ḳhud-gumānī kā

kyā balā kā hai nasha ishq ke paimāne meñ
koī hoshiyār nahīñ aql ke kāshāne meñ

sarsarāhaT reñgte lamhe kī sarkañDoñ meñ thī
thā nasha saarī fazā meñ nāginoñ ke zahr kā

hosh jo thā so ek umr mujh ko kahīñ na le gayā
kam to nahīñ ki le gayā us kā nasha idhar udhar

bismil ke taḌapne kī adāoñ meñ nasha thā
maiñ haath meñ talvār liye jhuum rahā thā

aib shohrat meñ nahīñ is kā nasha qātil hai
ye havā kitne charāġhoñ ko bujhā detī hai

nashsha pilā ke ḳhuub mirā hāl-e-dil sunā
kuchh tum bhī dil kī baat batāo nashe meñ aao

havā ke sayyāl bāzuoñ par ghaTā ke shab-rañg kārvāñ haiñ
nasīm-e-mastāna raqs meñ hai fazā meñ nashsha sā chhā rahā hai

sar-bulandī kā nasha jin ko chaḌhā hai saaqī
shauq se vo tirī dahlīz pe sar rakhte haiñ