Tags-Aib

chun rahe haiñ jo aib auroñ ke
apne dāman pe bhī nazar kar leñ

ājizī aaj hai mumkin hai na ho kal mujh meñ
is tarah aib nikālo na musalsal mujh meñ

salīqa ye bhī to hai sar uThā ke jiine kā
jo ham meñ aib haiñ in ko hunar banāyā jaa.e

'shārib' maiñ chhupūñ laakh zamāne kī nazar se
lekin ḳhabar-e-aib-o-hunar ho ke rahegī

aib apne chehre kā kis ko nazar aayā 'obaid'
aa.ine meñ sab ko apnī sūrateñ achchhī lagīñ

na thī haal kī jab hameñ apne ḳhabar rahe dekhte auroñ ke aib o hunar
paḌī apnī burā.iyoñ par jo nazar to nigāh meñ koī burā na rahā

har baat kā behtar hai chhupānā hī ki ye bhī
hai aib kare koī jo zāhir hunar apnā

nigāh-e-yār ne kuchh aise aib DhūñDh liye
tamām kār-e-mohabbat dobāra karnā paḌā

chīñ-bar-jabīñ na ai but-e-chīñ rah ġhurūr se
tasvīr kā hai aib jo chehra bigaḌ gayā

dushman pe bhī nigāh rahe aib meñ hai vo
ye kyā ki sirf chāhne vāloñ ko dekhiye

jabhī to ḳhār-e-dil-e-dostāñ nahīñ huuñ abhī
ki aib mujh meñ bahut haiñ hunar ziyāda nahīñ

ik baar apnā zarf-e-nazar dekh lījiye
phir chāhe jis ke aib-o-hunar dekh lījiye

aib tūl-e-kalām mat kariyo
kyā karūñ maiñ suḳhan se ḳhūgar thā

ḳhālī safā.ī-qalb se behtar hai dāġh-e-ishq
kyā aib hai ki jis ke muqābil hunar nahīñ

vaa.iz ko apne aib-e-riyā kā rahā ḳhayāl
rindoñ kī saaf saaf mazammat na ho sakī

merī har baat meñ sau aib the har aib meñ shāḳh
ye ġhanīmat hai mirī qadr bhī jaanī tum ne

khul hī jaate haiñ un pe aib-o-hunar
ā.īne se jo baat karte haiñ

ayyām-e-shabāb apne bhī kyā aish-asar the
kahte haiñ jinheñ aib vo us vaqt hunar the

tujh se ham-āhañg thā utnā kashish jaatī rahī
maiñ tirā ham-qāfiya thā aib-e-ītā ho gayā

aib apnī aañkh kā yā faiz terā kyā kahūñ
ġhair kī sūrat pe mujh ko terā dhokā ho gayā