Tags-Nazakat

gul nazākat ke aage us rū ke
chashm-e-bulbul meñ ḳhaar hovegā

ham pe aur teġh-e-nāz uTh na sake
chochle haiñ tirī nazākat ke

is nazākat kā burā ho bazm se
uThte haiñ vo dast-e-dushman thaam ke

bikhre ga.e gul-e-nāzuk havā ke jhoñke se
gilā jo thā to nazākat se thā havā se na thā

vasl kī shab vo Darāte haiñ ye kah kah ke mujhe
tum satāo tumheñ kosegī nazākat merī

bahut mumkin hai ye bhī ek din nāzuk-badan nikle
maiñ patthar ko bhī shīshe kī nazākat baañT detā huuñ

nafīs naak nazākat sirāt adl bahār
jamīl sutvāñ mo.attar latīf ḳhushbū rachī

phir isī muñh pe nazākat kā karoge da.avā
ġhair ke naaz uThāte ho ye kyā karte ho

allāh re nazākat-e-lab-e-yār
but-ḳhāne paḌe jo mai-kashī kī

is kamar par is nazākat par ye sīdhī chaal kyuuñ
bal nahīñ to kuchh nahīñ kuchh ḳham nahīñ to kuchh nahīñ

paañv rakhte bhī nazākat se agar hoñge kahīñ
be-badal husn-e-jahāñ-soz pe nāzāñ hoñge

allāh-rī nazākat-e-jānāñ ki sher meñ
mazmūñ bañdhā kamar kā to dard-e-kamar huā

shīsha-e-dil jo nazākat meñ guhar se kam nahīñ
ishq meñ kaise sitam sahne kī ḳhū kartā rahā

shāḳh-e-gul kī nazākat ubālī ga.ī
narm bāñhoñ ke sāñche meñ Dhālī ga.ī

jaisī hai badan meñ gul-ruḳh ke vaisī hī nazākat bātoñ meñ
hoñToñ meñ hai jitnī shīrīnī utnī hī halāvat bātoñ meñ

na hilī jab zabāñ nazākat se
rah ga.e dekh kar bulā na sake

hai yaañ talak to nazākat guloñ ke gajre se
lachakne lagtā hai us gul-azār kā pahuñchā

pāband-e-nazākat thī nairañgī-e-gul-chīnī
surḳhī-e-gul-e-tar se hāthoñ kī hinā uljhī

resham ke lachchhe haiñ baal maḳhmal ke TukḌe haiñ gaal
hai ye nazākat kā haal patlī kamar baal hai

kuchh apnī nā-tavānī kuchh tirā pās-e-nazākat thā
nigāhoñ meñ mohabbat kī kahānī le ke aayā huuñ