Tags-Nazakat

rāsta rok liyā fart-e-nazākat ne kabhī
paas aa.e to unheñ duur hayā ne rakkhā

nigāh-e-shauq ne mujh ko ye raaz samjhāyā
hayā bhī dil kī nazākat pe zarb-e-kārī hai

ye zamāna baḌā nāzuk hai sambhal kar chaliye
jān-e-man itnī nazākat bhī burī hotī hai

vo nāznīñ ye nazākat meñ kuchh yagāna huā
jo pahnī phūloñ kī baddhī to dard-e-shāna huā

kiyā sharminda itnā saḳht-jānī ne nazākat se
ḳhajālat se sar un ke sāmne mushkil se uThtā hai

kahāñ ḳhanjar bhī dast-e-nāvak-e-qātil se uThtā hai
nazākat se hinā kā baar bhī mushkil se uThtā hai

tere suḳhan-e-saḳht meñ hai husn-e-nazākat
kānoñ ko huī pamba-e-mahtāb kaḌī baat

vo but qat.a kartā hai zulfoñ ko shāyad
nazākat par us kī girāñ ho ga.ī haiñ

yuuñ to kyā aa.egā tū fart-e-nazākat se yahāñ
saḳht dushvār hai dhoke meñ bhī aanā terā

ai bahār-e-gulshan-e-nāz-o-nazākat har taraf
tere aane se huī hai aur bhī bustāñ meñ dhuum

maiñ ne āġhosh-e-tasavvur meñ bhī kheñchā to kahā
pis ga.ī pis ga.ī bedard nazākat merī

Dartā huuñ kahīñ taab nazākat se na khāve
mū-e-kamar us zulf-e-pareshāñ se ulajh kar

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

vo un kā hijāb aur nazākat ke nazāre
aa.e vo shab-e-va.ada tasavvur ke sahāre

hamāre shīsha-e-dil ko sambhal kar haath meñ lenā
nazākat is meñ itnī hai nazar se jab girā TuuTā

shāḳh-e-gul meñ jo nazākat jo lahak aa.ī hai
terī bāhoñ kī lachak hai terī añgḌā.ī hai

gar nazākat meñ na hotā misl-e-tār-e-ankabūt
ḳhuub ulfat se zamāna meñ koī rishta na thā

ye nazākat kī numā.ish ye fareb-āmez chaal
dosh-e-hastī par terā nāpāk hastī hai vabāl

tum ko nazākat aur ḳhudā de ham ko lazzat aur ḳhudā de
pā.eñche tum chuTkī se uThā lo thāme hue chalte haiñ kamar ham