Tags-Nazara

nazzāre ne bhī kaam kiyā vaañ naqāb kā
mastī se har nigah tire ruḳh par bikhar ga.ī

ai shauq-e-nazāra kyā kahiye nazroñ meñ koī sūrat hī nahīñ
ai zauq-e-tasavvur kyā kiije ham sūrat-e-jānāñ bhuul ga.e

ḳhvāb āḳhir ḳhvāb hai is ḳhvāb kā kyā e'tibār
jannat-e-nazzāra goyā jannat-e-mauhūm hai

ishq farmūda-e-qāsid se subuk-gām-e-amal
aql samjhī hī nahīñ ma.anī-e-paiġhām abhī

aah muztar ab vo jalve haiñ na vo ra.anā.iyāñ
har nazāra sāya-e-umr-e-gurezāñ ho gayā

hasad se dil agar afsurda hai garm-e-tamāshā ho
ki chashm-e-tañg shāyad kasrat-e-nazzāra se vā ho

dil-e-jūñ-sham.a bahr-e-dāvat-e-nazzāra lāya.anī
nigah labrez-e-ashk o siina ma.amūr-e-tamannā ho

bahar-e-takmīl-e-nazarā ye bhī lāzim hai 'nasīm'
mere un ke darmiyāñ haa.il koī pardā na ho

tālib-e-yak-nazāra huuñ itnā bhī mujh se bair kyā
muñh to mirī taraf ko ho go ki do-chār ho na ho

mahdūd hai nazzāra jab haiñ yahī do-ālam
yā apnī taraf dekho yā merī taraf dekho

kyuuñ tire chāh-e-zanaḳhdāñ kā na nazzāra kareñ
jī se bhātā hai bahut sabza-e-chāhī ham ko

ā.īna husn-e-sabīh bhī kyā dekhe ki vo vaqt-e-nazzāra
dam bhar nahīñ jamte shauq-e-nazar ke paañv phisalte rahte haiñ

maiñ us din terī aamad kā nazāra sochtī thī
vo din jab tere jaane ke liye ruknā paḌā thā

begāna-sifat jāda-e-manzil se guzar jā
har chiiz sazā-vār-e-nazāra nahīñ hotī

tāb-e-nazzāra nahīñ aa.ina kyā dekhne duuñ
aur ban jā.eñge tasvīr jo hairāñ hoñge

jab vo jamāl-e-dil-faroz sūrat-e-mehr-e-nīm-roz
aap hī ho nazzāra-soz parde meñ muñh chhupā.e kyuuñ

'sāqī' vo dekh shāhid-e-mai-nosh aa gayā
labrez hai ye shā.eq-e-nazzāra jām-e-shauq

kamāl-e-shauq-e-nazzāra meñ uryāñ hotā jaatā hai
sar-e-bām-e-falak vo māhtāb āhista āhista

tāqat-e-nazzāra jab minnat-pazīr-e-hosh ho
bahr-jalva phir koī bālā-e-bām aayā to kyā