Tags-Neend

ye kis ne haat peshānī pe rakkhā
hamārī niiñd puurī ho ga.ī hai

maut bar-haq hai ek din lekin
niiñd rātoñ ko ḳhuub aatī hai

āñkhoñ meñ vasvasoñ kī na.ī niiñd bas ga.ī
so jā.ūñ ek umr se jaagā huā huuñ maiñ

ye shikan-ālūd bistar
niiñd ke TukḌe paḌe haiñ

niiñd kī soī huī ḳhāmosh galiyoñ ko jagāte
gungunāte

kabhī dikhā de vo manzar jo maiñ ne dekhe nahīñ
kabhī to niiñd meñ ai ḳhvāb ke farishte aa

kal raat jagātī rahī ik ḳhvāb kī duurī
aur niiñd bichhātī rahī bistar mire aage

niiñd aañkh meñ bharī hai kahāñ raat bhar rahe
kis ke nasīb tum ne jagā.e kidhar rahe

yahāñ aaseb kī tahvīl meñ hai niiñd kī devī
yahāñ ke log ḳhvāboñ ke liye betāb haiñ saare

qissa-go ab tirī chaupāl se maiñ jaatā huuñ
raat bhī bhiig chukī niiñd bhī aa.ī huī hai

niind bhī jāgtī rahī puure hue na ḳhvāb bhī
sub.h huī zamīn par raat Dhalī mazār meñ

kisī ko niiñd na aatī ho raushnī meñ agar
to ḳhud charāġh-e-mohabbat bujhānā paḌtā hai

ba.ad muddat mujhe niiñd aa.ī baḌe chain kī niiñd
ḳhaak jab oḌh lī aur ḳhaak bichhā lī maiñ ne

ek hī mas.ala tā-umr mirā hal na huā
niiñd puurī na huī ḳhvāb mukammal na huā

ḳhvāb kā sailāb kyā guzrā nigāhoñ se mirī
ret palkoñ se jo chipkī niiñd bhī chubhne lagī

rūdād-e-mohabbat sun sun kar ḳhud husn ko bhī niiñd aane lagī
ab aur kahāñ se laa.eñ dil ab aur kahānī kyā kahiye

mashīneñ ghar dhuāñ gandum qatāreñ
mulāzim niind bachche ḳhvāb sahrā

ai 'fuġhāñ' dard-e-dil sunūñ kab tak
uḌ ga.ī niind is fasāne se

ham ne sau rāteñ jagā.īñ tab huā ye ittifāq
so usī din ko dharī thī niiñd aanī aap kī

pur-sukūñ niiñd chāhte ho 'nazīr'
saath laanā thā qismat-e-bedār