Tags-Neend

niiñd kā zahar nigāhoñ meñ samāyā jab se
ratjagoñ se mirī bā-zābta yaarī na rahī

tū ne ghar yuuñ to bulandī pe banāyā hai 'figār'
tū magar niiñd meñ chaltā hai ḳhudā ḳhair kare

chhīn liiñ ḳhushiyāñ mirī āñkhoñ se merī niiñd bhī
zindagī tū ne mujhe ab tak diyā kuchh bhī nahīñ

maiñ niiñd vaadī meñ jab bhī 'hasan' utarne lagā
hazār rañg ke sapne bhī aa ke saath utre

niiñd aatī hai agar jaltī huī āñkhoñ meñ
koī dīvāne kī zanjīr hilā detā hai

āñkhoñ āñkhoñ hariyālī ke ḳhvāb dikhā.ī dene lage
ham aise ka.ī jāgne vaale niiñd hue sahrāoñ kī

lagtā hai lauT jā.egī māyūs niiñd phir
masrūf us kī yādoñ meñ baiThā huā huuñ maiñ

niiñd kyuuñ nahīñ aatī ḳhvāb ḳhvāb āñkhoñ ko
shahr-e-jāñ meñ har jānib kyuuñ ye rat-jagā sā hai

pal bhar meñ sho.ala bhaḌkegā shahr khañDar ho jā.eñge
jaltī sham.eñ haath meñ le kar rūh-e-zamāna niiñd meñ hai

haft-aflāk ne dastak de kar pūchhā thā kis haal meñ ho
ik darvesh ne baḌh ke sadā dī ye sayyāra niiñd meñ hai

āhan-paikar āvāzoñ par ham ne jinheñ tasḳhīr kiyā
sote sote chauñk uThte haiñ aisā dhaḌkā niiñd meñ hai

shahr-panāh kī dīvāroñ par ik duzdāna aahaT hai
aur maiñ us ko dekh rahā huuñ shahr to saarā niiñd meñ hai

ik ijlās thā dīvānoñ kā jis kī ye rūdād banī!
sadiyoñ se bīmār hai duniyā aur masīhā niiñd meñ hai

uTThegā aur lamha-bhar meñ hashr bapā ho jā.egā
har lamha aisā lagtā hai koī fitna niiñd meñ hai

ḳhvāboñ kī ik bhiiḌ lagī hai jism bechārā niiñd meñ hai
aadhā chehra niiñd se bāhar aadhā chehra niiñd meñ hai

jaag rahī hai rūh-e-āhan ḳhvāb meñ hai insāñ kā zamīr
bedārī kī sau lahreñ haiñ phir bhī ye duniyā niiñd meñ hai

raat kal gahrī niiñd meñ thī jab
ek taaza safed canvas par

gul-badan pahne haiñ vo mahram-e-kamḳhāb nahīñ
niiñd aane kā mire dil meñ hai Dar aaj kī raat

kartā huuñ niind meñ hī safar saare shahr kā
fāriġh to baiThtā nahīñ sone ke bāvajūd

achānak haḌbaḌā kar niiñd se maiñ jaag uTThā huuñ
purānā vāqi.a hai jis pe hairat ab huī hai