Tags-Neend

thiiñ qist jitnī bhī ḳhvāboñ kī be-hisāb paḌī
kiyā hai niiñd ne sab ko lagān meñ shāmil

nisf shab ko niiñd meñ chaltā huā paikar koī
naqsh-e-pā kyuuñ chhoḌ jaatā hai dayār-e-ḳhvāb meñ

mujhe tere irādoñ kī ḳhabar thī
so gahrī niiñd meñ bhī jāgtā thā

maut kī niiñd magar ab ke zarūr uchTī hai
varna ham aisoñ ko jhapkī sī kahāñ aatī hai

ik ḳhvāb niiñd kā thā sabab, jo nahīñ rahā
us kā qalaq hai aisā ki maiñ so nahīñ rahā

mirī niind mūnis-e-ḳhvāb kar mirī rat-jagoñ kā hisāb kar
mire naam fasl-e-gulāb kar kabhī aisā mujh ko bhī pyaar de

chalte chalte jo thake paañv to ham baiTh ga.e
niiñd gaThrī pe dharī ḳhvāb shajar par rakkhā

shab-e-visāl kahāñ ḳhvāb-e-nāz kā mauqa.a
tumhārī niiñd ko aate hayā nahīñ aatī

bistar kī zarūrat hī nahīñ niiñd ko pyāre
kyā jism kī chādar hī bichhānī nahīñ aatī

vaañ ki us ko niiñd misl-e-maġhfirat hāsil rahī
yaañ koī āzurdagī se tā-qazā be-ḳhvāb thā

tujh husn ne diyā na kabhū mufsidī ko chain
fitna na tere daur meñ phir niiñd so sakā

ai niiñd chhupe rahne de do-chār nazāre
jab aañkh khulegī koī manzar na bachegā

magar jāgnā apnī qismat meñ thā
bulātī rahī niiñd kī jal-parī

āñkhoñ se duur sub.h ke taare chale ga.e
niiñd aa ga.ī to ġham ke nazāre chale ga.e

sochūñ tamām din dar-e-aqdas ko maiñ 'qamar'
aate hī niiñd gumbad-e-ḳhazrā dikhā.ī de

niiñd kī āġhosh meñ thak kar girūñ maiñ jab kabhī
ḳhvāb jī uThte haiñ mere aur mar jaatā huuñ maiñ

kahāñ hai niiñd ki ham ḳhvāb dekheñ amrit kā
jo shaam guzrī hai us kā hai zahr āñkhoñ meñ

phir tamāzat tire pahlū kī jagā detī hai
niiñd meñ bhī tirī is ghaat se jī Dartā hai

kaisā ḳhvāb aur niiñd kahāñ kī
muddat ho ga.ī aañkh lagā.e

niiñd par merī dastaras ġhā.er
aur na ḳhvāboñ pe iḳhtiyār mirā