Tags-Neend

tire baġhair tere intizār se thak kar
shab-e-firāq ke māroñ ko niind aa.ī hai

niiñd siiñ khul ga.iiñ mirī āñkheñ so dekhā yaar kuuñ
yā añdhārā is qadar thā yā ujālā ho gayā

kitne dinoñ ke ba.ad hameñ niiñd aa.ī hai
āhista baat kījiye ham jaag jā.eñge

mujhe bhī niiñd na aa.e use bhī chain na ho
hamāre biich bhalā itnā pyaar thoḌī hai

kisī dastak pe merī niiñd TuuTī
magar maiñ so gayā dil hī nahīñ thā

kuuch kī saa.at aa ga.ī sar par 'shād' uThā le jholī-bistar
niiñd meñ saarī raat basar kī chauñk musāfir raat nahīñ hai

āñkheñ malte sehn-e-chaman meñ jhuum ke uTThe niiñd ke maate
dekh sabā ne aa ke ḳhabar kī chauñk musāfir raat nahīñ hai

mirī band palkoñ par TuuT kar koī phuul raat bikhar gayā
mujhe siskiyoñ ne jagā diyā mirī kachchī niiñd uchaT ga.ī

ab mujhe niiñd hī nahīñ aatī
ḳhvāb hai ḳhvāb kā sahārā bhī

jāgne kā savāl hī na rahā
aaj kī raat niiñd kyā aa.ī

Thaharnā hogā kyā usī ghar meñ
aañkh meñ niiñd kī parī soche

raat ke pichhle pahar niiñd meñ chalte hue log
ḳhuun hote hue mahtāb se Dar jaate haiñ

niiñd nahīñ aatī thī sāzish ke dhaḌke meñ
fāteh ho kar bhī kis darja buzdil thā maiñ

hotī hai niiñd meñ kahīñ tashkīl-e-ḳhadd-o-ḳhāl
uThtā huuñ apne ḳhvāb kā chehra uThā ke maiñ

bichhaunā kāñToñ kā hai phir bhī aa.ī jaatī hai niiñd
abhī tasavvur-e-zānū-e-yār baaqī hai

aisā huā ki niiñd bhī rasta bhaTak ga.ī
sūraj bhī jaltī aañkh meñ sab dhuup bhar gayā

rasm hī niiñd kī āñkhoñ se uThā dī ga.ī kyā
yā mire ḳhvāb kī ta.abīr batā dī ga.ī kyā

shu.ūr jaa.e to fursat se niiñd bhī aa.e
fishār-e-zāt ne 'farhat' ko ranjisheñ dī haiñ

jāgoge shab-e-ġham meñ 'jalīl' aur kahāñ tak
sote nahīñ kyūñ? niiñd to āñkhoñ meñ bharī hai