Tags-Neend

shab ko ik baar khul ke rotā huuñ
phir baḌe sukh kī niiñd sotā huuñ

jhiñjhoḌte rahe ghabrā ke vo mujhe lekin
maiñ apnī niind se yaum-e-hisāb tak na uThā

chain kī phir niiñd aa.ī qabr meñ
apne tan se jab utārī zindagī

palkoñ pe niiñd niiñd meñ rakhtā hai ḳhvāb phir
detā hai dastakeñ bhī vahī rāt-bhar mujhe

vo mahak thī ki mujhe niiñd sī aane lagī thī
phuul sā ḳhvāb ke andar se nikaltā huā thā

ham ne dekhā thā use ujle dinoñ meñ 'hammād'
jin dinoñ niind thī aur niind meñ bedārī thī

niiñd āñkhoñ se judā thī
ḳhvāb meñ bhī ratjage the

jin ḳhvāboñ se niind uḌ jaa.e aise ḳhvāb sajā.e kaun
ik pal jhūTī taskīñ pā kar saarī raat gañvā.e kaun

junūñ meñ gum hue hoshyār ho kar
hameñ niiñd aa ga.ī bedār ho kar

jaise ki 'nazīr' un rātoñ par qudrat bhī karam farmātī thī
bedār ḳhudā kar detā thā āñkhoñ meñ agar niiñd aatī thī

āġhāz-e-shab-e-ġham hai kyuuñ sone lage taare
shāyad mirī āñkhoñ se kuchh niind churā.ī hai

niiñd aa jaa.e to phir dhuup na saaya koī
paañv thak jaa.eñ to pardes bhī ghar lagtā hai

tumhīñ batāo vo kaun hai jo har ek lamha satā rahā hai
na niiñd rātoñ ko aa rahī hai na chain din ko hī aa rahā hai

mīThī niiñd meñ Duube gaañv bujh ga.e saare diip
birhā ke māroñ kā sukh ke sapnoñ se kyā kaam

agar niiñd aa ga.ī tum ko to chashme suukh jā.eñge
kabhī ġhaflat meñ paḌ kar kohsāro tum na so jaanā

sachche haiñ apne va.ade ke aate vo ḳhvāb meñ
'nāzim' mujhī ko niiñd na aa.ī tamām raat

raat ke jaage sub.h kī halkī narm havā meñ so.e haiñ
dekheñ kab tak niiñd ke maate uThne meñ tāḳhīr kareñ

jo shab ko manzar-e-shab taab meñ tabdīl karte haiñ
vo lamhe niind ko bhī ḳhvāb meñ tabdīl karte haiñ

vo paas aane na paa.e ki aa.ī maut kī niiñd
nasīb so ga.e masrūf-e-ḳhvāb kar ke mujhe

aao palkoñ se chuneñ bikhre hue lamhāt ko
niiñd aa jaa.e na jab tak ḳhvāb kī bāteñ karo