Tags-Neend

niiñd ko bhī ḳhabar kahāñ 'renū'
mere ḳhvāboñ kī intihā kyā hai

tiir kī tarah kirneñ barsīñ sub.h nikalte sūraj kī
lahūluhān thā saarā chehra niiñd se jab bedār hue

halqa-e-nīnd ke manzar meñ udāsī thī 'sa.īd'
maiñ vahāñ ḳhvāb sunātā to qayāmat kartā

niiñd ā.ankhoñ meñ parindoñ kī tarah utrī hai aaj
ai nafas āhista chal ġharqāb hone de mujhe

palak fasāna sharārat hijāb tiir duā
tamannā niiñd ishāra ḳhumār saḳht thakī

kyā hī rah rah ke tabī.at mirī ghabrātī hai
maut aatī hai shab-e-hijr na niiñd aatī hai

niiñd se isrār na kartīñ shāyad merī āñkheñ bhī
pahle se ma.alūm jo hotā ḳhvāboñ kā anjām mujhe

dayār-e-ḳhvāb o chashm-e-dil-figārāñ
jazīra niiñd kā kyuuñ darmiyāñ hai

hijr ke chhoTe gaañv se ham ne shahr-e-vasl ko hijrat kī
shahr-e-vasl ne niiñd uḌā kar ḳhvāboñ ko pāmāl kiyā

na aa.egī havā ko niiñd kyūñ-kar
zamānoñ kī thakī-hārī huī hai

zard sūraj kī mash.al bhī kajlā ga.ī chāñd tāroñ ko bhī niiñd sī aa ga.ī
ab kisī ko agar raushnī chāhiye apnī palkoñ pe sham.eñ jalā kar chale

raat ka.ī āvāra sapne āñkhoñ meñ lahrā.e the
shāyad vo ḳhud bhes badal kar niiñd churāne aa.e the

maut kī niiñd se insāñ ko jagā detī hai
jis haqīqat meñ zarā rañg ho afsāne kā

jab niiñd aa rahī thī
chup-chāp gā rahī thī

sone kī koshisheñ to bahut kī ga.iiñ magar
kyā kījiye jo niiñd se jhagḌā ho raat bhar

pūchhiye mat kyā sukūn-e-mustaqil thā qabr meñ
muddatoñ ke ba.ad aisī niiñd meñ soyā thā maiñ

ik ḳhauf hai jo kuchh nahīñ karne detā
ik ḳhvāb hai jo niiñd meñ taḌpātā hai

TūTeñgī jab niiñd se palkeñ so jā.ūñgā chupke se
jis jañgal meñ raat paḌegī merā ghar ho jā.egā

maiñ ronā chāhtā huuñ ḳhuub ronā chāhtā huuñ maiñ
aur is ke ba.ad gahrī niiñd sonā chāhtā huuñ maiñ

āñkhoñ ne abhī niiñd kā dāman nahīñ chhoḌā
ḳhvāboñ se bharosa abhī TuuTā to nahīñ hai