Tags-Neend

shab-e-firāq mirī aañkh ko thakan se bachā
ki niiñd vaar na kar de tirī sahelī par

tū ne apnā chain gañvāyā merī niiñd uḌā dī hai
dil ke nāzuk rishte meñ to donoñ kā nuqsān huā

kaam adhūrā paḌā hai ḳhvāboñ kā
aaj phir niiñd ġhair-hāzir hai

bekal huā huuñ ab to tirī zulf meñ sajan
shab hai darāz niiñd hamārī uchaT ga.ī

kahīñ charāġhoñ ko niiñd aa.e kahīñ pe rabt-e-hijāb TuuTe
kisī kī āñkhoñ kī jaage qismat kisī kā band-e-naqāb TuuTe

nāla-e-āḳhir-e-shab kis ko sunā.ūñ 'nāsir'
niiñd pyārī hai mire daur ke fankāroñ ko

sukh niiñd be-ḳhudī kī use turt aa ga.ī
laagā jo gosh Tuk bhī mirī dāstāñ kī or

niiñd aa.e to maḳhmalī ehsās
varna bistar meñ hai salīb sī baat

niiñd mukammal karte karte
ḳhvāb adhūrā rah jaatā hai

aañkh meñ Thahrā huā sapnā bikhar bhī jā.egā
rāt-bhar meñ niiñd kā nashsha utar bhī jā.egā

niiñd mīThī niiñd āñkhoñ meñ bharī hai
dhuñd meñ har chiiz Duubī jā rahī hai

bahut bure ho mirī dikhāve kī niiñd ko bhī tum asl samjhe
kahīñ se sīkho piyār karnā mujhe jagāo mujhe manāo

na mujh ko niiñd aatī hai na dil se baat jaatī hai
ye kis ne kah diyā mujh se ki rasta dekhte rahnā

so jaate haiñ fōtpath pe aḳhbār bichhā kar
mazdūr kabhī niiñd kī golī nahīñ khāte

sub.h tak kyā kyā tirī ummīd ne ta.ane diye
aa gayā thā shām-e-ġham ik niiñd kā jhokā mujhe

pā kar bhī to niiñd uḌ ga.ī thī
kho kar bhī to rat-jage mile haiñ

bedārī ke bistar par maiñ un ke ḳhvāb sajātā huuñ
niiñd bhī jin kī TaaT ke uupar ḳhvāboñ se nādār girī

bharā rahtā hai kamre meñ añdherā
hamārī niiñd bhī ab so ga.ī hai

tamām shahr to be-mehr niiñd so rahā thā
magar maiñ āñkhoñ meñ nok-e-qalam chubho rahā thā

yahī hai niind kā manshā ki ḳhvāb-e-ġhaflat se
sahīh vaqt pe bedār ho liyā jaa.e