Tags-Pani

shikast-ḳhurda ye qaumeñ tumheñ miTā deñgī
agar tumhārī hamiyyat kā mar gayā paanī

ḳhudā kā ḳhauf nahīñ ab tumhāre zehnoñ meñ
tavahhumāt kā is tarah bhar gayā paanī

baḌā ġhurūr thā apnī chamak-damak pe use
sunār ne jo tapāyā utar gayā paanī

vo dhuup thī ki zamīñ jal ke raakh ho jaatī
baras ke ab ke baḌā kaam kar gayā paanī

zamāna DhūñD rahā thā kidhar gayā paanī
kisī kā hukm huā to Thahar gayā paanī

taras na aayā ġharīboñ ke haal par 'ājiz'
sisakte paudoñ ke sar se guzar gayā paanī

vo majbūrī maut hai jis meñ kaase ko buniyād mile
pyaas kī shiddat jab baḌhtī hai Dar lagtā hai paanī se

'ramz' samundar kī gahrā.ī merā sar-e-añgusht
maiñ jo kahūñ utro paanī meñ ujlat mat karnā

dā.era dar dā.era paanī kā raqs jāvedāñ
aañkh kī putlī ko dariyā ke bhañvar achchhe lage

taḌaptā huuñ bichhaḌ kar aap se kuchh is tarah 'jauhar'
binā paanī ke jaise ret pe machhlī taḌaptī hai

paanī kī maat tishna-laboñ ko na thī qubūl
sad shukr mujh ko ashk bahāne diye ga.e

jo aa ke ruke dāman pe 'sabā' vo ashk nahīñ hai paanī hai
jo ashk na chhalke ā.ankhoñ se us ashk kī qīmat hotī hai

peḌ mujhe hasrat se dekhā karte the
maiñ jañgal meñ paanī laayā kartā thā

jam.a hai zehn meñ kitnā ḳhas-o-ḳhāshāk-e-ḳhayāl
is khaḌe paanī meñ bhī mauj-e-balā aane de

ye chāñd jhiil ke paanī se ham-kalām hai kyuuñ
kināre kis liye rañj-o-malāl meñ gum haiñ

sharmāte rahte haiñ gahre log sabhī
dariyā bhī to paanī paanī hotā hai

sat.hī logoñ meñ gahrā.ī hotī hai
ye Duube to paanī gahrā hotā hai

vo bhīgā jism vo pairāhan-e-hayā kī shafaq
phir ik gulāb ko shādāb kar gayā paanī

ik e'tibār sī dīvār-e-āb hai har-sū
mire vajūd ko zanjīr kar gayā paanī

laboñ pe harf-e-duā raakh ho gayā lekin
diloñ meñ zaḳhm kī sūrat utar gayā paanī