Tags-Pani

agar vo gul-badan dariyā nahāne be-hijāb aave
ta.ajjub nahiñ ki sab paanī satī bū-e-gulāb aave

paanī ke intizār meñ phir ret phāñkiye
'aḳhtar' ye din bhī dhuup kī daldal meñ dhañs gayā

dasht ne hamāre shādāb jismoñ se paanī nichoḌ kar
un meñ pyaas bhar dī hai

dil bhar aa.e aur abr-e-dīda meñ paanī na ho
ye zamīñ sahrā dikhā.ī de jo bārānī na ho

ḳhushk roTī toḌnī hai sard paanī chāhiye
kyā kisī girje kī kunDī khaTkhaTānī chāhiye

aañsū ne dil kā har daaġh miTā Daalā
paanī se phir naqsh huvaidā ham ne kiyā

jo mehnat se apnī nikālegā paanī
to qadmoñ meñ us ke ye sansār hogā

likhī jā.egī tire barf ke naam
jo tamannā huī paanī merī

shor-e-dariyā hai kahānī merī
paanī is kā hai ravānī merī

ashk aise na bahāo mirā dil jalne do
aag ye vo nahīñ paanī se bujhāne vaalī

aisī pyaas aur aisā sabr
dariyā paanī paanī hai

khultā nahīñ hai ret hai paanī ki aur kuchh
merī nazar ke sāmne pahlā sarāb hai

muusā ne ek ḳhvāb-e-haqīqat banā diyā
vaise to gahre paanī meñ rasta sarāb hai

vo dhuup thī ki zamīñ jal ke raakh ho jaatī
baras ke ab ke baḌā kaam kar gayā paanī

piine ko paanī bhī na ho roTī kī baat kyā
netā-jī bhuuk tū yuuñ sahe to pata chale

ā.īna jo paanī meñ hai ġharq ye baa.is hai
tujh saḳht-dilī aage faulād bahut royā

pyaas lagtī hai inheñ dekh ke ai dasht-nashīñ
terī āñkheñ haiñ yā paanī ke pyāle hue haiñ

jaltī miTTī sūkhe kāñTe gahre paanī tīkhe sañg
sab ḳhatre paañv ke nīche sar pe balā koī bhī nahīñ

na jhaTko zulf se paanī ye motī TuuT jā.eñge
tumhārā kuchh na bigḌegā magar dil TuuT jā.eñge

jo reg-e-dil pe likhā hai us ko dukhoñ kā paanī miTā na Daale
maiñ ḳhvāb dekhe hī jā rahā huuñ ye aañkh barse hī jā rahī hai