Tags-Pani

paanī hove aarsī us mukh ko dekh
zohra use kyā ki iqāmat kare

le uḌā baad ke mānind pa paanī saaqī
kashtī-e-mai huī juuñ taḳht-e-sulaimāñ paidā

dil meñ paanī ne lagā dī aag aaj
vo hinā.ī haath dhonā yaad hai

ḳhālī haath aur ḳhālī chehre
paanī rasta DhūñDh rahā hai

allāh re be-hisī ki jo dariyā meñ ġharq hoñ
tālāb kī tarah kabhī paanī ravāñ na ho

bhūke bachchoñ kī tasallī ke liye
maañ ne phir paanī pakāyā der tak

ye kis kī pyaas ke chhīñTe paḌe haiñ paanī par
ye kaun jabr kā qissa tamām kar aayā

ek sab aag ek sab paanī
dīda-o-dil azaab haiñ donoñ

jis aadmī ko zahr bhī pachtā thā ai tabīb
piine lagā hai aaj vo paanī ubaal kar

paanī paanī huuñ jis ko dekh jahīm
soz-e-ġham se vo tafta huuñ yārab

āb-e-haivāñ ko mai se kyā nisbat
paanī paanī hai aur sharāb sharāb

jo bhes apnā badal ke aayā to rañg-e-itlāq muñh se dhoyā
kiyā hai paanī meñ qaid mujh ko havā kī sūrat habāb meñ huuñ

agarche paanī kī mauj ban kar hamesha maiñ pech-o-tāb meñ huuñ
vahī huuñ qatra vahī huuñ dariyā jo ain chashm-e-habāb meñ huuñ

tū agar abr hai maiñ abr meñ paanī kī tarah
maiñ tire saath huuñ lafzoñ meñ ma.ānī kī tarah

bahte paanī dukh-sukh bāñTeñ peḌ baḌe būḌhoñ jaise
bachchoñ kī aahaT sunte hī khet lahakne lagte the

paanī ne rāsta na diyā jān-būjh kar
ġhote lagā.e phir bhī rahe tishna-kām se

ye paanī ḳhāmushī se bah rahā hai
ise dekheñ ki is meñ Duub jaa.eñ

gahre paanī kī or baḌhte hī
ḳhud-ba-ḳhud dariyā roktā hai mujhe

paanī ko ḳhuun ḳhuun ko paanī likhegā kaun
jab tum nahīñ kabīr kī baanī likhegā kaun

qaa.il karūñ kis baat se maiñ tujh ko sitamgar
Dhalvān pe ruktā nahīñ paanī ho ki patthar