Tags-Pani

aag meñ ġham kī ho ke gudāzāñ jism huā sab paanī sā
ya.anī bin in shola-ruḳhoñ ke ḳhuub hī ham bhī taa.e ga.e

āñkheñ merī thiiñ labālab gard kā pahra thā yaañ
vo ye samjhā dhoka hai sahrā meñ paanī dekh kar

chāroñ jānib paanī kī pahnā.ī hai
kahīñ nahīñ hai koī kinārā āñkhoñ meñ

agar maiñ sach kahūñ to sabr hī kī āzmā.ish hai
ye miTTī imtihāñ pyāre ye paanī āzmā.ish hai

chhīn kar lab se tabassum kī lakīr
jhiil sī āñkhoñ meñ paanī de gayā

tum ne kuchh paḌh kar phūñkā miTTī ke pyāle meñ
yā miTTī meñ guñdhī huī tāsīr hai paanī kī

aao
shabnam ke paanī meñ jhāñkeñ

jis meñ tūfān bhañvar mauj na gahrā.ī ho
aise paanī meñ kabhī bhuul ke utrā na karo

dariyā ke paas dekho kab se khaḌā huā hai
ye kaun tishna-lab hai paanī se Dar rahā hai

ab iḳhtiyār meñ maujeñ na ye ravānī hai
maiñ bah rahā huuñ ki merā vajūd paanī hai

raat ga.e jab so jaatā hai paanī gahrī niiñd
naġhmoñ kī lahreñ uThtī haiñ chalte chappū se

isī paanī meñ machhlī kā makāñ hai
isī paanī meñ pyāse ham mare haiñ

sard-mehrī kā tirī saaqī natīja ye huā
aag ke moloñ jo biktī thī vo mai paanī huī

rafta rafta dīda-e-tar ko Duboyā ashk ne
paanī riste riste kashtī merī tūfānī huī

saath us kā nibhātā huuñ to ye merā hunar hai
vo shaḳhs ba-yak-vaqt hai paanī bhī agan bhī

sharāb-e-arġhavānī bhī piyūñ maiñ ḳhud to paanī hai
pilā.e tū jo paanī bāda-e-shīrāz hai saaqī

haqīqat ghol rakhtā hai vo rūmānoñ ke paanī meñ
manāzir Thos detā hai nazar sayyāl detā hai

tasvīr liye letā hai har hauz kā paanī
goyā ki javānī ke muqābil hai javānī

niile paanī pe mun.akis jo hue
maiñ vo mahtāb-o-āftāb rahī

chal diye sab dost mujh ko Dūbtā hī chhoḌ kar
ġham baTāne ke liye dariyā kā paanī rah gayā