Tags-Pani

vo mujh pe pheñktā paanī kī kulliyāñ bhar bhar
maiñ us ke chhīñToñ se to pairahan bhigotā thā

ab maiñ paanī talāsh kartā huuñ
bhuuk thī merā mas.ala pahle

bahtā paanī phuul kañval ke saath bahā le aatā hai
amn kī aashā naav banī hai dariyāoñ ke dhāroñ meñ

ik ajab sailāb sā dil ke nihāñ-ḳhāne meñ thā
ret sāhil duur tak paanī hī paanī kashtiyāñ

pyārī ammī mujhe batāo
bādal paanī kahāñ se laa.e

sulgī huī hai ġham kī bhaTTī dil kyuuñ na pighal ke bane paanī
jo qatra aañsū ho ke bahā lahrā ke chalā teyorā ke girā

Thahre paanī ke sard shīshe meñ
guzre mausam ke aks haiñ larzāñ

kabhī sahrā meñ rahte haiñ kabhī paanī meñ rahte haiñ
na jaane kaun hai jis kī nigahbānī meñ rahte haiñ

un se ma.anī kashīd kar apne
naqsh ubhre haiñ jo bhī paanī par

tū bhī kar ġhaur is kahānī par
jo likhī jā rahī hai paanī par

dil ko sho.aloñ se kartī hai sairāb
zindagī aag bhī hai paanī bhī

āvegā vo chaman meñ na ai abr jab talak
paanī guloñ ke muñh meñ chuvāyā na jā.egā

na kashish huuñ maiñ zamīñ kī na huuñ paanī kā uchhāl
zarre uḌtā huā bahtā huā dariyā huuñ maiñ

ek dariyā ko dikhā.ī thī kabhī pyaas apnī
phir nahīñ māñgā kabhī maiñ ne dobārā paanī

pahlī buuñd girī Tap se
phir sab kuchh paanī meñ thā

kuchh apne daur kī bhī kahānī likhā karo
patthar ko mom ḳhuun ko paanī likhā karo

donoñ jale bhī donoñ bujhe bhī
ek hue jab aag aur paanī

bhuul gayā ḳhushkī meñ ravānī
dariyā meñ thā kitnā paanī

na samjhe ashk-fishānī ko koī māyūsī
hai dil meñ aag agar aañkh meñ bhī paanī hai

haqīqat meñ koī kahānī milā do
bahut aag hai thoḌā paanī milā do