Tags-Pani

aag paanī bhī hai miTTī hai havā hai mujh meñ
mere ḳhāliq kā koī raaz chhupā hai mujh meñ

dasht kī pyaas kisī taur bujhā.ī jaatī
koī tasvīr hī paanī kī dikhā.ī jaatī

ik surūr-o-kaif kā aalam hai taarī bin piye
pyāle saade paanī ke bhī mai ke paimāne lage

ye azāb-e-āsmānī ye itāb-e-nā-gahānī
haiñ kahāñ samajhne vaale mire āñsuoñ ko paanī

ham na pyāse haiñ na paanī ke liye aa.e haiñ
tere hamrāh ravānī ke liye aa.e haiñ

paanī ho jaate haiñ aañsū mire motī ban kar
varna achchhī to na thī un se guhar kī sūrat

zindagānī kī halāvat uTh ga.ī
dāna-pānī kā mazā jaatā rahā

bārish hai to aisī ki laraz jaa.e zamīñ bhī
paanī hai ki miTTī ko bhī talvār banā jaa.e

kyuuñ na is āvāra bādal ko duā.eñ dījiye
jo samundar ko ḳhalish sahrā ko paanī de gayā

ristā paanī bhī ġhanīmat hai vo din duur nahīñ
rauzan-e-chashm se jab ret nikalne lag jaa.e

safar kaaTā hai kitnī mushkiloñ se
vahāñ saaya na thā paanī jahāñ thā

mirī mohabbat ubalte alfāz kī na muhtāj hai na hogī
ye ThanDā paanī gilās meñ hai magar pasīna gilās par hai

samundaroñ ke musāfiro kuchh izāfī paanī bhī saath rakhnā
ki ik jazīra baḌī hī muddat se chand qatroñ kī aas par hai

paañv maarā thā pahāḌoñ pe to paanī niklā
ye vahī jism kā aahan hai ki miTTī niklā

ḳhvāb ke gaañv meñ pale haiñ ham
paanī chhalnī meñ le chale haiñ ham

vo jo paanī ke ghar meñ rahtā hai
aag lagne pe bas havā degā

balā kī pyaas thī hadd-e-nazar meñ paanī thā
ki aaj ḳhvāb meñ sahrā thā ghar meñ paanī thā

ajiib dasht-e-tamannā se thā guzar 'ḳhālid'
badan meñ reg-e-ravāñ thī safar meñ paanī thā

tamām umr ye uqda na vā huā mujh par
ki haath meñ thā yā chashm-e-ḳhizar meñ paanī thā