Tags-Pani

azaab utrā to paañv sab ke zamīñ kī sat.hoñ se aa lage haiñ
havā ke ghar meñ nahīñ hai koī machān paanī meñ bah rahā hai

tamām fasleñ ujaḌ chukī haiñ na hal bachā hai na bail baaqī
kisān girvī rakhā huā hai lagān paanī meñ bah rahā hai

ajiib manzar hai bārishoñ kā makān paanī meñ bah rahā hai
falak zamīñ kī hudūd meñ hai nishān paanī meñ bah rahā hai

udaas āñkhoñ ke bādaloñ ne diloñ ke gard-o-ġhubār dho.e
yaqīn patthar banā khaḌā hai gumān paanī meñ bah rahā hai

gahre paanī meñ zarā aao utar kar dekheñ
ham ko dariyā ke kināre nahīñ achchhe lagte

yūnān ke saḳhī to talḳhāb nazr kar deñ
paanī aziiz rakkheñ ahl-e-furāt mujh se

vo jis ne mujh ko registān meñ paanī pilāyā thā
mujhe lagtā hai ḳhud vo mehrbāñ pyāsā rahā hogā

ashkoñ meñ us ke husn kī lau tairtī rahī
paanī ke āsmān pe mahtāb sā rahā

yuuñ apnī pyaas kī ḳhud hī kahānī likh rahe the ham
sulagtī ret pe uñglī se paanī likh rahe the ham

barq-o-bārāñ ke jilau meñ badliyāñ
saath le kar aag paanī aa ga.iiñ

paanī paanī kahne vaale dariyā dariyā Duub ga.e
kis muñh se sāhil vāloñ se tishna-labī kī baat kareñ

maiñ ashk huuñ maiñ os kā qatra huuñ sharar huuñ
andāz baham hai mujhe paanī ke safar kā

ashkoñ meñ piro ke us kī yādeñ
paanī pe kitāb likh rahā huuñ

dariyā ke madd-o-jazr bhī paanī ke khel haiñ
hastī hī ke karishme haiñ kyā maut kyā hayāt

tū agar aag hai vo paanī hai
'bahr' ke shar se ḳhauf kar ai dil

ab rishtoñ meñ gahrā.ī
bahte paanī par kaa.ī

ye garm ret ye sahrā nibhā ke chalnā hai
safar tavīl hai paanī bachā ke chalnā hai

ye zamīñ sabza ye paanī āsmāñ shams-o-qamar
kaun hai in kā musavvir hai pas-e-tasvīr kaun

saḳhtī-e-dahr hue bahr-e-suḳhan meñ āsāñ
qāfiye aa.e jo patthar ke maiñ paanī samjhā

kahā maiñ ne mirī āñkhoñ meñ paanī hai
javāb aayā mohabbat kī nishānī hai