Tags-Pani

nayā lahja ġhazal kā misra-e-sānī meñ rakkhā hai
huā ko muTThiyoñ meñ aag ko paanī meñ rakkhā hai

ek muddat se to Thahre hue paanī meñ huuñ maiñ
aur had ye hai ki kahnā hai ravānī meñ huuñ maiñ

tum jo hote to baat kuchh hotī
ab ki bārish to sarf paanī hai

dhoke dariyā meñ bhabūkā se haath
aag paanī meñ lagāyā na karo

sohnī yā sohne se pahle haq hai ghaḌe par paanī kā
kab se ghaḌī meñ jab aur tab se zyāda ab kā hissa hai

uThtī huī maujoñ ke nīche kitnā gahrā paanī hai
ham jaise kuchh log na Dūbeñ to andāza kaise ho

batā.ūñ hai kyā āñsuoñ kī haqīqat
jo samjho to sab kuchh na samjho to paanī

basoñ par tabassum to āñkhoñ meñ paanī
yahī hai yahī dil-jaloñ kī nishānī

is aql kī maarī nagrī meñ kabhī paanī aag nahīñ bantā
yahāñ ishq bhī log nahīñ karte yahāñ koī kamāl nahīñ hotā

jo sairāb kareñ tirī sabza-gāheñ umr ke paanī se
thoḌī sī hariyālī hotī un ke zard muqaddar meñ

samajh lo paanī se nisbat use rahī hogī
jo canvas pe samundar banā.e royā hai

ye ab gharoñ meñ na paanī na dhuup hai na jagah
zamīñ ne 'talḳh' ye shahroñ ko bad-duā dī hai

asā jab hazrat-e-mūsā ne maarā bahte paanī par
to paanī phaT gayā aur sāmne rasta nikal aayā

nikal kar aañkh se ġhā.eb nahīñ hote haiñ ye aañsū
isī paanī se bhartā umr kā paimāna aatā hai

qisse se tire merī kahānī se ziyāda
paanī meñ hai kyā aur bhī paanī se ziyāda

be-sutūñ ko kaaT kar laayā thā zālim jū-e-shīr
kohkan kī hasratoñ par phir bhī paanī phir gayā

zillat-o-rusvā.ī kī had bhī hai koī Duub mar
ai dil-e-nākām ab to sar pe paanī phir gayā

muñh tirā kyuuñ aaj zor-e-nā-tavānī phir gayā
us ke aate hī mire chehre pe paanī phir gayā

vo havā hai use kahāñ DhūñDūñ
aag meñ ḳhaak meñ ki paanī meñ

jhilmilāte haiñ kashtiyoñ meñ diye
pul khaḌe so rahe haiñ paanī meñ