Tags-Pani

ākāsh hai qadmoñ ke nīche dariyā kā paanī sar par hai
ik machhlī naav pe baiThī hai aur sab machhuvāre jaal meñ haiñ

uTh rahī thiiñ duur tak paanī kī dīvāreñ 'ḳhalīl'
ham ye samjhe naqs koī apnī bīnā.ī meñ hai

paanī ke aa.ine meñ kyā aañkh paḌ ga.ī hai
dariyā meñ kaisā kaisā girdāb aa rahā hai

vaqt yuuñ tham gayā hai āñkhoñ meñ
dā.ere jam ga.e hoñ paanī meñ

ab tabī.at kahāñ ravānī meñ
kashtī TuuTī hai Thahre paanī meñ

hai bāzāroñ meñ paanī sar se ūñchā
mire ghar meñ bhī tuġhyānī bahut hai

bahte dariyāoñ meñ paanī kī kamī dekhnā hai
umr bhar mujh ko yahī tishna-labī dekhnā hai

shikva koī dariyā kī ravānī se nahīñ hai
rishta hī mirī pyaas kā paanī se nahīñ hai

ye fāqa-kash ki jinheñ haif ḳhud-farebī meñ
shikam kī serī ko paanī bilonā paḌtā hai

bātil ke haath pe ye zulm haq vāloñ se bai.at lete the
mehmān banā kar laa.e the paanī bhī na piine dete the

ashk-e-ġham roke raheñ fāqa-guzāroñ se kaho
paanī gulḳhan se chalā nuuh ke tūfāñ ke liye

gudāz-e-ātish-e-ġham siiñ huī haiñ bāvlī añkhiyāñ
añjhū ke bhāñt paanī ho ke maaTī meñ rulī añkhiyāñ

sahrā ke sañgīn safar meñ āb-rasānī kam na paḌe
saarī āñkheñ bhar kar rakhnā dekho paanī kam na paḌe

ḳhudā mahfūz rakkhe fasl-e-dil ko
kahīñ sūkhā kahīñ paanī bahut hai

paḌī hai jab se tumhārī chhāyā nadī kā paanī chamak uThā hai
ki bahte dariyā meñ diip jaise jalā rahī haiñ tumhārī āñkheñ

āshiq bipat ke maare rote hue jidhar jaañ
paanī siiñ us taraf kī rāheñ tamām bhar jaañ

ḳhabar ye ghol na de machhliyoñ ko paanī meñ
machhere ā.eñge kal sub.h jaal saath liye

paanī kī chādareñ haiñ ḳhushkī hai maut un kī
ye ashk paak hoñge sāhil kī āstīñ se

sulagtī ret meñ paanī kahāñ thā
koī bādal chhupā thā tishnagī meñ

marne kā sukh jiine kī āsānī de
andātā kaisā hai aag na paanī de