Tags-Pani

har saal bahār se pahle maiñ paanī par phuul banātā huuñ
phir chāroñ mausam likh jaate haiñ naam tumhārā āñkhoñ meñ

sañg the pighle to paanī ho ga.e
ham vo chehre jo kahānī ho ga.e

maiñ vo TuuTā huā taarā jise mahfil na raas aa.ī
maiñ vo shola jo shab bhar aañkh ke paanī meñ rahtā hai

maiñ vo sahrā jise paanī kī havas le Duubī
tū vo bādal jo kabhī TuuT ke barsā hī nahīñ

paanī meñ bhī chāñd sitāre ug aate haiñ
aañkh se dil tak vo zarḳhezī ho jaatī hai

aks paanī meñ agar qaid kiyā jā saktā
ain-mumkin thā maiñ us shaḳhs ko apnā saktā

dard kā dariyā baḌhte baḌhte siine tak aa pahuñchā hai
aur chaḌhegā thoḌā paanī raat ghanerī hone tak

ātish-e-ġham ḳhāna-e-dil meñ bujhāne ke liye
aur ro lūñgā abhī āñkhoñ meñ paanī aur hai

tujh se bhī kab huī tadbīr mirī vahshat kī
tū bhī muTThī meñ kahāñ bheñch sakā paanī ko

sar-e-sahrā mirī āñkhoñ kā talātum jaagā
mauja-e-reg ne sarshār kiyā paanī ko

mere hone se yahāñ aa.ī hai paanī kī bahār
shāḳh-e-girya thā sar-e-dasht lagāyā gayā maiñ

baḌe baḌe da.ave haiñ lekin chhoTe chhoTe qad 'shahzād'
phāñknī hai kuchh ḳhaak un ko kuchh paanī unheñ bilonā hai

dariyā meñ tuġhyānī hai
bastī bastī paanī hai

ek aañsū ne Duboyā mujh ko un kī bazm meñ
buuñd bhar paanī se saarī aabrū paanī huī

sunte haiñ jo ham dasht meñ paanī kī kahānī
āzār kā āzār kahānī kī kahānī

zi-bas ḳhūñ-gashta-e-rashk-e-vafā thā vahm bismil kā
churāyā zaḳhm-hā-e-dil ne paanī teġh-e-qātil kā

kisī lashkar se kahīñ bahtā paanī ruktā hai
kabhī jū-e-ravāñ kisī zālim kī jāgīr huī

sahrā kī pyaas le ke chalā jin ke saath saath
paanī kī ek buuñd na thī un ghaTāoñ meñ

māñgte haiñ log paanī kī duā bā-chashm-e-nam
ḳhush hai bādal har taraf tezāb barsāte hue

baaġh meñ nahreñ bharī haiñ phuul phal kā thā mazā
band haiñ kunj-e-qafas meñ dāna-pānī ab kahāñ