Tags-Pani

barq-andāz na kis tarah karūñ nāla-e-garm
jaan betāb hai bijlī kī tarah taḌ paanī

ye añdherā ye shab-e-tār kahāñ jāoge
din haiñ barsāt ke galiyoñ meñ hai kīchaḌ paanī

mere rone se dil-e-sañg jo aab aab na ho
kohsāroñ se gire phir na dhaḌā-dhaḌ paanī

maiñ jo ai 'shād' na ro.uuñ sifat abr-e-bahār
paa.eñ ik qatra kahīñ jhiil na jhābaḌ paanī

abr-e-dīda kā mire ho jo na ojhaḌ paanī
phir kahīñ jhiḌkī lagā.e na kahīñ jhaḌ paanī

tīr-bārāñ mizha-e-yār mujhe kartī hai
maiñ samajhtā huuñ barastā hai jhaḌā-jhaḌ paanī

rashk-e-la.al-e-lab-e-lālīñ se jigar-ḳhūñ yāqūt
sharm-e-dandāñ se hai motī kī har ik laḌ paanī

ujaaḌ fasleñ hanūt saa.e makān Tiile sarāb galiyāñ
utar ke paanī banā gayā hai zamīñ pe naqsh-o-nigār kaise

sharm-o-hayā sab qisse haiñ
sūkhā aañkh kā paanī hai

use rone do mat roko ki ronā bhī zarūrī hai
kabhī is ātish-e-sayyāl ko paanī kareñge ham

pāniyoñ meñ ye bhī paanī ek din tahlīl thā
qatra-e-be-sarfa ko lekin guhar us ne kiyā

kyā ḳhabar tujh ko guzārī kaise maiñ ne shām-e-ġham
āñsuoñ kā paanī le kar maiñ vuzū kartī rahī

jaane vaale mujhe kuchh apnī nishānī de jā
ruuh pyāsī na rahe aañkh meñ paanī de jā

lagā.ī aag paanī meñ ye kis ke aks ne pyāre
ki ham-dīgar chalī haiñ mauj se dariyā meñ shamshīreñ

log dariyāoñ pe kyuuñ jaan diye dete haiñ
tishnagī kā to ta.alluq hī nahīñ paanī se

har sansanātī shai pe thī chādar dhueñ kī 'rāz'
ākāsh meñ shafaq thī na paanī pe dā.ere

band paanī ke bhañvar meñ kho ga.ī kashtī mirī
aañkh jal-thal thī magar aañsū koī Tapkā na thā

pāgal na ho to aur ye paanī bhī kyā kare
vahshī na hoñ to aur havāoñ se bhī ho kyā

ḳhaak atrāf meñ uḌtī hai bahut paanī de
is masāfat ko bhī ek ḳhitta-e-bārānī de

dariyā hai bahtā paanī har mauj hai ravānī ruktī nahīñ kahānī
jitnā likhā gayā hai itnā hī vāqi.a ho ye baat to ġhalat hai