Tags-Pani

ham ne kahā ki ashk lahū hai jigar kā dost
us ne kahā ki chhoḌiye paanī hai aur bas

sarv-e-qirtās-e-muqarriz huuñ maiñ is gulzār meñ
ḳhaak meñ paanī milātā hai masaltī hai havā

ashk paanī nahīñ the magar
maiñ bahātā rahā raat bhar

mere girye ke asar se ho ga.e patthar bhī aab
jhaḌte haiñ jā-e-sharar paanī ke qatre sañg se

ye kis kī pyaas ke chhīñTe paḌe haiñ paanī par
ye kaun jabr kā qissa tamām kar aayā

uchhāl detā hai patthar vo Thahre paanī meñ
maiñ pur-sukūn jo mahsūs hone lagtā huuñ

ek charāġh yahāñ merā hai ek diyā vahāñ terā
biich meñ aqlīmeñ paḌtī haiñ paanī aur añdherā

ye kashtiyāñ barf se Dhakī niilī choTiyoñ par nazar jamā.e
havā se Takrātī sard paanī ko kāTtī baḌhtī jā rahī haiñ

'zeb' yahāñ paanī kī koī thaah nahīñ
kitnī gahrā.ī meñ patthar jaatā hai

andar andar khokhle ho jaate haiñ ghar
jab dīvāroñ meñ paanī bhar jaatā hai

paanī bhī alag chhān ke rakkhā thā lahū se
lekin kisī pairā.e meñ ik pyaas na aa.ī

ishq meñ piine kā paanī bas aañkh kā paanī
khāne meñ bas patthar khaa.e jā sakte the

pyāso raho na dasht meñ bārish ke muntazir
maaro zamīñ pe paañv ki paanī nikal paḌe

tumhārī nazroñ kā hai muqaddar ye jhiil kā pur-sukūn paanī
ham apnī āñkhoñ ke canvas par hazār maujeñ ubhārte haiñ

maiñ bhī tālāb kā Thahrā huā paanī thā kabhī
ek patthar ne ravāñ dhaar kiyā hai mujh ko

paanī ke ka.ī rañg dhanak meñ haiñ ki tū hai
tasvīr meñ aa.ī hai tirī shakl nikhar ke

aag kā rishta nikal aa.e koī paanī ke saath
zinda rah saktā huuñ aisī hī ḳhush-imkānī ke saath

lafzoñ meñ har ik ranj samone kā qarīna
us aañkh meñ Thahre hue paanī se milā hai

ham bhī raushan hoñ utāreñ ye gunāhoñ kā libās
tū baraste hue paanī kī tarah paak to ho

ham pī bhī ga.e aur salāmat bhī haiñ 'amabar'
paanī kī har ik buuñd meñ hiire kī kanī thī