Tags-Pani

paanī se huvaidā hotī hai duniyā meñ ḳhudā kī rahmat bhī
paanī meñ dikhā.ī detī hai tasvīr-e-azāb-o-la.anat bhī

tirī teġh kī aab jaatī rahī hai
mire zaḳhm paanī churā.e hue haiñ

thoḌā sā kahīñ jam.a bhī rakh dard kā paanī
mausam hai koī ḳhushk sā barsāt se aage

sāvan kī bahāroñ meñ naġhma haiñ na jhūle haiñ
ākāsh kī āñkhoñ meñ rotā huā paanī hai

apnī to mohabbat kī itnī sī kahānī hai
TuuTī hui kashtī hai Thahrā huā paanī hai

apnā ghar ham ne basāyā hai lab-e-dariyā to phir
bām-o-dar tak aa.egā ik roz paanī dekhnā

ḳhaak uḌtī hai to har-sū mire andar varna
jis taraf maiñ huuñ vahāñ chāroñ taraf paanī hai

kitnā ajīb-tar hai ye rabt-e-zindagānī
hastī tamām shola aalam tamām paanī

sail-e-sarishk-e-ġham se 'anjum' ḳhāna-e-dil barbād na ho
dekho dekho ka.aba kī buniyād meñ paanī martā hai

baḌā hasīn sā manzar hai apnī āñkhoñ meñ
dikhā.ī detā hai paanī meñ māhtāb koī

dālān meñ sabza hai na tālāb meñ paanī
kyuuñ koī parinda mirī dīvār pe utre

ye mohabbat hai mohabbat sargirānī ho to kyā
shiddat-e-ġham se jigar kā ḳhuun paanī ho to kyā

be-dilī kī tah meñ ġhota maar kar baiThe haiñ ham
'zeb' phir paanī pe kab ubhregā patthar dekhiye

phir is ke baad mirī raat be-misāl huī
udhar vo shola-badan thā idhar maiñ paanī thā

miTTī kā paanī se rishta shāyad hai kamzor
varna kisht-e-jāñ meñ kāñTe bo saktā hai kaun

dariyā kī lahreñ gin gin ke
paanī kī botal ko dekhā

kabhī damkeñ sone ke zarre kabhī jhalke murġhābī kā lahū
ka.ī pyāse kab se khaḌe haiñ magar paanī shaffāf nahīñ hotā

sitārā sā nazar aatā hai uupar se jahāñ paanī
maiñ ḳhush-fahmī ke is gahre kueñ meñ kab nahīñ utrā

hotā rahā muqābla paanī kā aur pyaas kā
sahrā umaD umaD paḌe dariyā biphar biphar ga.e

miTTī se mashvara na kar paanī kā bhī kahā na maan
ai ātish-e-darūñ mirī pābandī-e-havā na maan