Tags-Pani

phir us ke baad thā ḳhāmosh paanī
ki log aa.e the dariyā dekhne ko

mausamoñ vaale na.e daana o paanī vaale
ham vahī log vahī naql-e-makānī vaale

haañ bachā leñge yahī shahr ko jal jaane se
kuchh to baaqī haiñ abhī shahr meñ paanī vaale

apnā hai phir apnā lahū
paanī āḳhir paanī hai

har shai ānī-jānī hai
jīvan bahtā paanī hai

ujlā tirā bartan hai aur saaf tirā paanī
ik umr kā pyāsā huuñ mujh ko bhī pilā paanī

phir dekh ki ye duniyā kaisī nazar aatī hai
'mushtāq' mai-e-ġham meñ thoḌā sā milā paanī

jab shaam utartī hai kyā dil pe guzartī hai
sāhil ne bahut pūchhā ḳhāmosh rahā paanī

kyā kyā na milī miTTī kyā kyā na dhuāñ phailā
kaalā na huā sabza mailā na huā paanī

donoñ hī to sachche the ilzām kise dete
kānoñ ne kahā sahrā āñkhoñ ne sunā paanī

hai ik ḳhat-e-nādīda dariyā-e-mohabbat meñ
hotā hai jahāñ aa kar paanī se judā paanī

vo zindagī hai us ko ḳhafā kyā kare koī
paanī ko sāhiloñ se judā kyā kare koī

ab bas karo ki āñkhoñ meñ paanī nahīñ rahā
is zindagī meñ ab koī tohmat nahīñ rahī

jo sabz-bāġh-e-tamannā pe pher de paanī
ḳhudā bachā.e ham aisī nazar se dar-guzre

shafīq sūraj ḳhamosh paanī magar abhī bhī kamī hai kuchh kuchh
'charāġh'-sāhab ke sher paḌh kar kareñ mukammal hamīñ udāsī

nairañgī-e-qudrat kā vahī diid kare hai
paanī kī tarah ho jo har ik rañg meñ rach-rach

laboñ pe jis ke musalsal pukār paanī kī
usī kī aañkh se dariyā bhī ik ravāñ dekhūñ

aur hī chehra nikāleñ surḳhiyāñ dhānī ke saath
ab ke sāvan kaash barse aag bhī paanī ke saath

hamārī zindagī thī ik talāsh paanī kī
jahāñ pe ret kā 'dvij' ek chhantā dariyā thā

phir samundar meñ utar jā.egā paanī buuñd buuñd
jaal meñ dam toḌtī kuchh machhliyāñ rah jā.eñgī