Tags-Pani

bajā.e mai diyā paanī kā ik gilās mujhe
samajh liyā mire saaqī ne bad-havās mujhe

TukḌe nahīñ haiñ āñsuoñ meñ dil ke chaar pāñch
surḳhāb baiThe paanī meñ haiñ mil ke chaar pāñch

buuñd paanī ko mirā shahr taras jaatā hai
aur bādal hai ki dariyā pe baras jaatā hai

ziist hai kachche ghaḌe ke mānind
bahte paanī pe hai miTTī qaa.em

tumhārī shakl in āñkhoñ meñ aa jaatī hai din Dhalte
ye donoñ sīpiyāñ phir raat bhar paanī meñ rahtī haiñ

kaun rahtā hai paar dariyā ke
ye jo paanī hai kyoñ biphar rahā hai

machalte paanī meñ ūñchā.ī kī talāsh fuzūl
pahāḌ par to koī bhī nadī nahīñ jaatī

kāhish kā dariyā bhī ḳhvāhish kā ghar thā
paanī bharne aa.e aur nahañg bhare

katrāte haiñ bal khāte haiñ ghabrāte haiñ kyuuñ log
sardī hai to paanī meñ utar kyuuñ nahīñ jaate

is tarah ham ne samundar ko pilāyā paanī
apnī kashtī kisī sāhil pe na moḌī ham ne

aadat sī hai nashsha na ab kaif
paanī na piyā sharāb pī lī

tumhārī āñkhoñ kā paanī kahīñ na ban jā.ūñ
maiñ Dar rahā huuñ bahut dāstāñ sunātā huā

yā to ik mauj-e-balā-ḳhez hai merī ḳhātir
yā ki mashkīza-e-jāñ meñ kahīñ paanī bhī nahīñ

ḳhūn-e-ehsās ko maujoñ kī ravānī samjhe
ashk-e-gul-rañg the vo ham jinheñ paanī samjhe

bajā hai karte haiñ paanī pe dastaḳhat sab log
jo hausla hai to naam apnā āsmān pe likh

saarā paanī chhāgaloñ se ābloñ meñ aa gayā
chilchilātī dhuup ke jalte hue isrār par

dhuup meñ paanī meñ sardī meñ havā ke saath saath
jaan apnī de rahā hai aaj bhī mazdūr kyuuñ

āñkheñ andhe kueñ kī mānind duur añdhere rastoñ par paanī ko khurach raheñ haiñ
gahrī dhuñd kī chādar oḌhe kaun abhāgan

ashkoñ meñ piro ke us kī yādeñ
paanī pe kitāb likh rahā huuñ

pyāsoñ kī bastī meñ sho.ale bhaḌkā kar
phir paanī ko mahñgā karnā paḌtā hai