Tags-Pani

is ishq ne āḳhir hameñ barbād kiyā hai
ham log isī khaulte paanī meñ mare haiñ

koyaleñ kūkīñ bahut dīvār-e-gulshan kī taraf
chāñd damkā hauz ke shaffāf paanī meñ bahut

dil koh kā ho gayā hai paanī
dariyā sab iztirāb meñ hai

aisā mātam kabhī dariyā kā na dekhā na sunā
jaane kis pyaas ne paanī ko azā-dār kiyā

ye duniyā hai yahāñ aslī kahānī pusht par rakhnā
laboñ par pyaas rakhnā aur paanī pusht par rakhnā

apne hāthoñ pilā.e ḳhushbū tū
saada paanī sharāb hai pyāre

ye saaqī ne sāġhar meñ kyā chiiz de dī
ki tauba huī paanī paanī hamārī

is qadar ġhaur se mat dekh bhañvar kī jānib
tū bhī chakrā ke na gir jaa.e kahīñ paanī meñ

aisā ek maqām ho jis meñ dil jaisī vīrānī ho
yādoñ jaisī tez havā ho dard se gahrā paanī ho

aa.ine meñ kis kī āñkheñ dekhtā huuñ maiñ 'jamīl'
do kañval haiñ beach paanī meñ magar nam-dīda haiñ

andar thī jitnī aag vo ThanDī na ho sakī
paanī thā sirf ghaas ke uupar paḌā huā

hamārī zindagānī ko baġhair az terī qudrat ke
koī paanī ko paanī kar bahā saktā hai kyā qudrat

ab tirī yaad jo aa.e bhī to yuuñ aatī hai
jaise kāġhaz kī koī naav chale paanī meñ

safīna aql kā 'bebāk' ġharq hai mutlaq
hai kitnā zarf meñ paanī samajh sako to kahūñ

narm zamīñ aur paanī ke muhtāj nahīñ haiñ ham
ham to vo koñpal haiñ jo patthar se nikle haiñ

is aql kī maarī nagrī meñ kabhī paanī aag nahīñ bantā
yahāñ ishq bhī log nahīñ karte yahāñ koī kamāl nahīñ hotā

pūchhā kisī ne haal kisī kā to ro diye
paanī meñ aks chāñd kā dekhā to ro diye

ḳhushk dariyāoñ ko paanī de ḳhudā
bādbānoñ ko ravānī de ḳhudā

chaTTān ke kaT jaane kā imkān bahut hai
paanī kī isī tarah jo raftār rahegī

maiñ miTTī aag aur paanī kī sūrat muntashir thā
phir ik din sab anāsir ho ga.e yak-jān mere