Tags-Pani

use pahchānñā āsāñ nahīñ jo
havā kā rañg paanī kā maza hai

sabab us kī pareshānī kā maiñ huuñ
namak kī fasl vo paanī kā maiñ huuñ

maiñ Thahre paanī kī mānind qaid huuñ ḳhud meñ
koī nasheb kī jānib mujhe bahā hī de

itnā āsāñ nahīñ paanī se shabīheñ dhonā
ḳhud bhī ro.egā musavvir ye qayāmat kar ke

samajhnā thā mujhe bārish kā paanī
tumheñ kapḌe bhigonā chāhiye thā

us kī shīrīñ-labī kī hasrat meñ
shahd paanī ho shaan se niklā

dushman se ḳhatar vaalo lamhoñ pe nazar rakhnā
har lamha-e-hastī bhī talvār kā paanī hai

barsāt meñ bhīgā hai doshīza badan us kā
nāseh ko bhī bulvā lo ab aag meñ paanī hai

qadam rakhte hī jaise khul gayā daldal meñ darvāza
ajab kārīgarī dekhī yahāñ miTTī meñ paanī kī

udāsī shaam tanhā.ī kasak yādoñ kī bechainī
mujhe sab sauñp kar sūraj utar jaatā hai paanī meñ

paanī ko patthar kahte haiñ
kyā kuchh dīda-var kahte haiñ

paanī nahīñ mazīd mayassar se kyā ba.iid
jinping se kyā umiid narendr se kyā ba.iid

kashtī mirī hai paanī pe yuuñ to ravāñ-davāñ
rahtī hai mauj ban ke kināra tumhārī yaad

jigar-e-sañg ho jahāñ paanī
vo vahāñ mujh ko āzmātā hai

teġh-e-qātil jo ho ga.ī be-āb
zaḳhm paanī magar churātā hai

thā ā.īne ke sāmne chehra khulā huā
paanī pe jaise chāñd kā saaya paḌā huā

us ne pheñkā mujh pe patthar aur maiñ paanī kī tarah
aur ūñchā aur ūñchā aur ūñchā ho gayā

ġham kā dariyā suukh na jaa.e us kī ravānī kam na paḌe
ḳhūn-e-jigar bhī shāmil kar luuñ aañkh meñ paanī kam na paḌe

zāhid sharāb piine se kāfir huā maiñ kyuuñ
kyā DeḌh chullū paanī meñ īmān bah gayā

safā-parvarāñ shola-rū mil chukā
kabhī aag aur paanī bāham na ho