Tags-Phool

kashish se husn kī chandā meñ uThe madd-o-jazr
kisī ko saañs chaḌhā sab kī saañs phuul ga.ī

kisī ke nuur ko chuñdhiyā ke dekheñ hairat se
charāġh jugnū sharar āftāb phuul jhaḌī

kisī ke marmarīñ ā.īne meñ numāyāñ haiñ
ghaTā bahār dhanak chāñd phuul diip kalī

harīr atlas-o-kamḳhvāb pañkhuḌī resham
kisī ke phuul se talvoñ se shāh-māt sabhī

har baras rañg pe aatā hī gayā ye gulzār
phuul tahzīb ke khilte ga.e miTte ga.e ḳhaar

maiñ zauq-e-ilm le kar turbat-e-sayyad par aayā huuñ
aqīdat ke shagufta phuul apne saath laayā huuñ

phuul nargis ke banā.e kab vahāñ me.amār ne
ye hamārī naqsh-bar-dīvār āñkheñ ho ga.iiñ

ye aarzū ke sitāre ye intizār ke phuul
chamak rahī haiñ ḳhatā.eñ mahak rahe haiñ gunāh

roz puujā ke liye phuul sajātā hai 'salām'
jaane kab us kā ḳhudā sū-e-zamīñ aa.egā

tū hī batā ruḳhsār pe us ke kitne til haiñ kitne daaġh
tū ne to ai dīda-e-bīnā phuul ko patthar dekhā hai

rāsta rok sakī haiñ na fasīleñ na hisār
phuul jañgal meñ khile shahr meñ ḳhushbū aa.e

shā.erī phuul khilāne ke sivā kuchh bhī nahīñ hai to 'zafar'
baaġh hī koī lagātā ki jahāñ khelte bachche jā kar

ḳhaar bhī nā-mutma.in haiñ phuul bhī nā-mutma.in
bāġhbāñ ke is nizām-e-gulistāñ kī dhuum hai

zaḳhmoñ ke bayābāñ meñ koī phuul na patthar
yādoñ ke jazīre meñ na but haiñ na ḳhudā hai

har-sū ḳhushbū ko fazāoñ meñ bikhartā dekhūñ
jab kisī shāḳh pe ik phuul ko martā dekhūñ

pītāmbar nafīs kamar meñ kasā huā
ḳhushbū se haar phuul kī mandir basā huā

ik aag sī lagā.ī hai Tesū ne phuul ke
kyā zard zard phuul khile haiñ babūl ke

sarsoñ ke lahlahāte haiñ khet is bahār meñ
nargis ke phuul phuul uThe lāla-zār meñ

patte jo zard zard haiñ sone ke paat haiñ
sadbarg se talā.ī kiran phuul maat haiñ