Tags-Phool

baat agar na karnī thī kyuuñ chaman meñ aa.e the
rañg kyuuñ bikherā thā phuul kyuuñ khilā.e the

apne sab chehre chhupā rakkhe haiñ ā.īne meñ
maiñ ne kuchh phuul khilā rakkhe haiñ ā.īne meñ

kahīñ ke phūl-patte haiñ kahīñ ke phal kahīñ ke haiñ
kuchh aise peḌ bhī bhārat kī dhartī par nikal aa.e

halkī havā ke ik jhoñke meñ kaise kaise phuul gire
gulshan ke gul-posh na jāneñ gulshan saarā jaane hai

haath lagte hī bikhar jaate haiñ rañgoñ kī tarah
phuul se paikar samay kī āñdhiyoñ ke darmiyāñ

lāla-rū phir bahār aa.ī hai
kyuuñ na hue phuul kī farāvānī

tum jo do phuul chaḌhāo to ḳhushī ke maare
qabr khul jaa.e ye phūle tan-e-lāġhar apnā

apne dil meñ yādoñ ne zaḳhmoñ ke phuul khilā.e haiñ
jism kī is dīvār ke andar kis ne naqab lagā.ī hai

roz nikal jaate haiñ ḳhālī ghar se ḳhālī dil ko le kar
aur apnī ḳhālī turbat par phuul sajā kar aa jaate haiñ

zindagī merī tamannāoñ mire ḳhvāboñ kā ruup
phuul maiñ huuñ rañg maiñ huuñ abr maiñ barsāt maiñ

vaqt kī tez havāoñ ne ajab moḌ liyā
phuul se haath jo the un meñ bhī patthar nikle

raah meñ āñkheñ bichhā.e
phuul nargis ke mile

tum kabhī patthar kī mūrat the magar ab phuul ho
apnī tabdīlī kā matlab aa.ine meñ dekhnā

naqsh-e-tilism merā dil-e-dāġh-dār thā
thā din ko phuul raat ko sham-e-mazār thā

aaj sūkhe phuul jab ham ko kitāboñ meñ mile
sochne par yaad aayā bāġhbāñ kā khel hai

zaḳhm-e-dil dāġh-e-jigar dāġh-e-tamannā kī qasam
chāñd se phuul se Dar ham ko yahāñ hotā hai

sun to rahe haiñ der se shor bahut bahār kā
jaane kahāñ khile haiñ phuul jaane kahāñ bahār hai

phuul kī ḳhushbū havā kī chaap shīshe kī khanak
kaun sī shai hai jo terī ḳhush-bayānī meñ nahīñ

kabhī kitāboñ meñ phuul rakhnā kabhī daraḳhtoñ pe naam likhnā
hameñ bhī hai yaad aaj tak vo nazar se harf-e-salām likhnā

kalī kalī ashkoñ kī laḌiyāñ phuul phuul ye komal giit
kis kī sej sajā.ī 'bāqar' kis kā ruup nikhāroge