Tags-Phool

sīrat na ho to āriz-o-ruḳhsār sab ġhalat
ḳhushbū uḌī to phuul faqat rañg rah gayā

umr bhar laḌtā rahā jo vaqt kī chaTTān se
kal mire kāñdhe pe us kī laash jaise phuul thī

phūloñ meñ vahī to phuul Thahrā
jo tere salām ko khilā ho

muddat ke ba.ad phuul kī sūrat khilā thā dil
shabnam kī tarah tāza-o-tar intizār thā

añgḌā.ī le rahī thī gulistāñ meñ jab bahār
har phuul apne rañg kī ātish meñ jal gayā

vo jān-e-nau-bahār jidhar se guzar gayā
peḌoñ ne phuul pattoñ se rasta chhupā liyā

be-irāda chaleñge to lā-hāsilī ke masā.ib se bach jā.eñge
tum kahoge koī phuul rakh dūsre haat par

ye phuul mujhe koī virāsat meñ mile haiñ
tum ne mirā kāñToñ bharā bistar nahīñ dekhā

aap aa.e to bahāroñ ne luTā.ī ḳhushbū
phuul to phuul the kāñToñ se bhī aa.ī ḳhushbū

maan mausam kā kahā chhā.ī ghaTā jaam uThā
aag se aag bujhā phuul khilā jaam uThā

haiñ shagūfe nanhe nanhe
phuul lekin

zaḳhm kaho yā khiltī kaliyāñ haath magar guldasta hai
bāġh-e-vafā se ham ne chune haiñ phuul bahut aur ḳhaar bahut

ek ik kar ke khilī thiiñ kaliyāñ ek ik kar ke phuul ga.e
ek ik kar ke ham se bichhḌe bāġh-e-jahāñ meñ yaar bahut

sūkhe hue peḌoñ pe koī phuul nahīñ hai
kyuuñ in se parinde bhī mohabbat nahīñ karte

phuul ā.ankhoñ se guzar kar tah-e-dil meñ bhī khilā
rut bhī badlī to vahī bū-e-saman aatī rahī

jab chale jā.eñge banjāre bahāreñ le kar
phuul vāloñ kī nagar bhar meñ dukāñ DhūñDoge

aag ke phuul pe shabnam ke nishāñ DhūñDoge
tum haqīqat ke liye vahm-o-gumāñ DhūñDoge

is ghar meñ koī chiiz kisī aur kī nahīñ
ye phuul ye charāġh fasānā usī kā hai

phuul kī ik pañkhuḌī kahiye use
zindagī ik barg-e-āvāra nahīñ

ab to us phuul kī nik.hat se mahaktī hai hayāt
zaḳhm-e-dil zaḳhm thā tahzīb-e-nazar hone tak