Tags-Phool

vo sukūn-e-jism-o-jāñ girdāb-e-jāñ hone ko hai
pāniyoñ kā phuul paanī meñ ravāñ hone ko hai

hazār barq gire laakh āñdhiyāñ uTTheñ
vo phuul khil ke raheñge jo khilne vaale haiñ

chāhūñ to bhar ke kaulī uThā luuñ abhī tumheñ
kaise hī bhārī ho mire aage to phuul ho

dil meñ mahak rahe haiñ kisī aarzū ke phuul
palkoñ pe khilne vaale haiñ shāyad lahū ke phuul

dīvāne kal jo log the phūloñ ke ishq meñ
ab un ke dāmanoñ meñ bhare haiñ rafū ke phuul

mere lahū kā rañg hai har nok-e-ḳhār par
sahrā meñ har taraf haiñ mirī justujū ke phuul

kaliyāñ chaTak rahī thiiñ ki āvāz thī koī
ab tak samā.atoñ meñ haiñ ik ḳhush-gulū ke phuul

ab tak hai koī baat mujhe yaad harf harf
ab tak maiñ chun rahā huuñ kisī guftugū ke phuul

mirī por por pe titliyāñ ka.ī rañg chhoḌ ke jā chukīñ
tire zikr kā koī phuul thā mare rat-jagoñ meñ khilā huā

phuul kaise vahāñ na ḳhaar lageñ
zikr terā jahāñ nahīñ hotā

maiñ apnī zaat kī tanhā.ī meñ muqayyad thā
phir is chaTān meñ ik phuul ne shigāf kiyā

mire hujre meñ tirī chaap ke jab phuul khileñ
aap hī aap charāġhoñ meñ Dhalī jā.ūñ piyā

kahte haiñ in shāḳhoñ par phal phuul bhī aate the
ab to patte jhaḌte haiñ yā patthar girte haiñ

ma.amūr ho gayā tirī dāvat se sab makāñ
itr aur paan phuul se dālān bhar diye

ye bhī bahut hai saiñkaḌoñ paude hare hue
kyā ġham jo bārishoñ meñ koī phuul mar gayā

baḳhshe haiñ mujh ko phuul mohabbat kī aag ne
mere liye sukūñ kā sabab iztirāb thā

phuul shāḳhoñ pe khilne lage tum kaho
jaam rindoñ ko milne lage tum kaho

zamāna phuul bichhātā thā merī rāhoñ meñ
jo vaqt badlā to patthar hai ab uThā.e hue

shāḳh jhukī chehre ke aage
TuuT ke phuul qabā meñ utrā

lahū meñ phuul khilāne kahāñ se aate haiñ
na.e ḳhayāl na jaane kahāñ se aate haiñ