Tags-Phool

phuul paanī par khilā mirī maujūdgī kā
saltanat sub.h-e-bahārāñ kī

phuul bastī meñ chaleñ ham-joliyoñ kā saath hai
shahroñ shahroñ baḌh gayā hai sañg-zādoñ kā futūr

is badan kā tilism TuuTe to
phuul kī tāzgī ko samjhūñgī

phuul kāġhaz ke haiñ ḳhushbū se bahut duur haiñ ye
merī maañ to unheñ be-kār chunā kartī hai

phuul kāġhaz ke haiñ ḳhushbū se bahut duur haiñ ye
merī maañ tū unheñ be-kār chunā kartī hai

rāt-bhar jaltā rahe chāhiye mujh ko vo charāġh
phuul kāġhaz ke haiñ kuchh der meñ jal jā.eñge

ik shaffāf darīche meñ kuchh rañg birañge manzar the
gul-dānoñ meñ phuul farozāñ ātish-dān bhaḌaktā thā

phuul samjhe na the zindagānī is qadar ḳhūb-sūrat milegī
ashk ban kar tabassum milegā dard ban kar masarrat milegī

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī

phuul pe aa ke baiThī to ḳhud par utarnā bhuul ga.ī
aisī mast huī vo titlī par phailānā bhuul ga.ī

kaliyoñ ne har bhañvre, titlī se pūchhā hai us kā naam
bād-e-sabā jis phuul ke ghar se lauT ke aanā bhuul ga.ī

az-rāh-e-ehtiyāt safar ko na ḳhatm kar
ye phuul haiñ ki aag qadam to jamā ke dekh

phuul khilte the 'tālib' ḳhushbū raqs kartī thī
aaj sho.ale raqsāñ haiñ shāḳh-e-shām-e-gulshan meñ

yuuñ nishāñ haiñ rāhoñ meñ kārvāñ ke qadmoñ ke
khil rahe huuñ har jānib phuul jis tarah ban meñ

gul jo taaze the khile kahte the shabnam se ye baat
dekh kar un ko jo vo phuul the kumhlā.e hue

mom kī sīḌhī pe chaḌh kar chhū rahe the āftāb
phuul se chehroñ ko ye koshish bahut mahñgī paḌī

āḳhirash kar liyā qubūl hameñ
us ne bheje haiñ laal phuul hameñ

phuul murjhā jā.eñge kāñTe lage rah jā.eñge
har ḳhushī miT jā.egī bas dukh hare rah jā.eñge

murjhā gayā jo dil meñ ujāle kā surḳh phuul
tāroñ bharā ye khet bhī banjar lagā mujhe

duur se dekhā hai nazdīk se bhī dekhūñgā
phuul sā lagtā hai jo phuul bhī ho saktā hai