Tags-Phool

vaqt ne ik nazar jo Daalī hai
phuul kī tāzgī churā lī hai

yuuñ bhī mahrūm haiñ ham rañg se ḳhushbū se 'nabīl'
phuul apne haiñ to gul-dān kisī aur kā hai

phuul haiñ ki lāsheñ haiñ baaġh hai ki maqtal hai
shāḳh shāḳh hotā hai daar kā gumāñ yaaro

shāḳh shāḳh par mausam-e-gul ne gajre se laTkā.e the
maiñ ne jis-dam haath baḌhāyā saare phuul parā.e the

phuul toḌe koī patthar ham ko maarā jaa.e hai
tū ne itnā kar diyā badnām dīvāne kā naam

phuul se zaḳhm kī ḳhushbū se mo.attar ġhazleñ
lutf dene lagīñ aur dard se ġhāfil huā maiñ

kahīñ na aisā ho apnā vaqār khā jaa.e
ḳhizāñ se phuul bachā.eñ bahār khā jaa.e

karishme husn ke sūraj sitāre phuul zāhir haiñ
magar maiñ kis taraf dekhūñ misāl-e-yār se pahle

pheñk de ḳhushk phuul yādoñ ke
zid na kar tū bhī be-vafā ho jā

nahīñ phuul maiñ ki mirī taraf kisī ḳhush-nazar kī nigāh ho
maiñ to ek zard sā paat huuñ kahīñ rāste meñ paḌā huā

vo ḳhvāh phuul ho mahtāb ho ki sāġhar ho
koī bhī shai ho na us ke javāb meñ rakhnā

siine ke vīrāne meñ ye ḳhushbū ek karāmat hai
varna itnā sahal nahīñ thā raakh meñ phuul khilā denā

us kā rasta dekhne vaalī āñkhoñ meñ
tairte rahte haiñ kuchh mannat vaale phuul

titlī terā rañg churāne aa.ī hai
ḳhush-rū titlī ke premī matvāle phuul

in hoñToñ ke lams meñ aisā jaadū hai
āñkhoñ par rakhte hī ho ga.e chhāle phuul

laal gulāb kā tohfa dene vaale sun
nahīñ haiñ tere lams se achchhe saale phuul

dahshat ke mausam meñ khilne vaale phuul
pattī pattī bikhre kaun sambhāle phuul

us ne bhī rūmāl pe itr lagā bhejā
ham ne bhī sharmā kar kaan meñ Daale phuul

maiñ ne vasl meñ hijr kī sargoshī sun lī
aur harī chādar par kāḌhe kaale phuul

aatī hai zindagī meñ ḳhizāñ bhī bahār bhī
sehn-e-chaman meñ phuul bhī hote haiñ ḳhaar bhī