Tags-Phool

khile hue haiñ umīdoñ ke phuul dil meñ magar
guzar na jaa.e kahīñ intizār kā mausam

tire vajūd se bāra-darī damak uTThī
ki phuul pallū sarakne se irti.āshā hai

bulbul ġhunūdgī meñ hai aur phuul muzmahil
afyūnchī ye saarā gulistāñ hai ġhāliban

kabhī mere liye the phuul jin meñ
ab un hāthoñ meñ patthar dekhtā huuñ

ḳhayāl ke phuul khil rahe haiñ bahār ke giit gā rahā huuñ
tire tasavvur kī sarzamīñ par na.e gulistāñ khilā rahā huuñ

ḳhayāl rahtā hai niiñd meñ ab usī parī kā
jo phuul ab shāḳh par khilegā khilā rahegā

phuul hī phuul haiñ har samt 'nadīm'
raah dushvār huī jaatī hai

ek gul-dasta banāyā thā pa-e-rāhat-e-jāñ
ab ye andesha hai har phuul bikhar jā.egā

maiñ āñdhī meñ reza reza ik phuul chun rahā huuñ
Darā Darā sā havā kī sāñsoñ ko sun rahā huuñ

kis rañg meñ haiñ ahl-e-vafā us se na kahnā
kyuuñ phuul haiñ ḳhushbū se judā us se na kahnā

koī dekhe ye sādgī apnī
phuul yādoñ kā ik sajā rakkhā

phuul khilte hī khul ga.iiñ āñhkeñ
kis ne ḳhushbū meñ sāneha rakkhā

ātish-e-rashk se jalte haiñ adū jal jaa.eñ
phuul 'rāhī' pe luTā.eñge luTāne vaale

phuul sā tujh ko mahaktā huā rakhte shab bhar
apne sāñsoñ se tujhe raat kī raanī karte

mausam-e-hijr bhī hañs detā hai jis vaqt tirī
yaad ke phuul ḳhayāloñ se sharārat kar deñ

ġham ke bhī kuchh phuul khile haiñ
zaḳhmoñ se bhī shāḳheñ niklīñ

kisī ko phuul khilāte hue mire ghar meñ
koī damaktā huā aa.ina milā ki nahīñ

ashkoñ kī ujlī kaliyāñ hoñ yā sapnoñ ke kundan phuul
ulfat kī mīzān meñ maiñ ne jo thā sab kuchh tol diyā

tirī sāñsoñ kī ḳhushbū se bhare hoñ
maiñ aise phuul bonā chāhtī thī

shabnam se pañkhuḌī bhī sulagtī hai phuul kī
nairañgī-e-ḳhizāñ bhī bahār-e-chaman meñ hai