Tags-Phool

jo din ko rañg lageñ aur shab ko phuul baneñ
vo sūrateñ kahīñ hoñgī magar kahāñ hoñgī

sabz shāḳhoñ par sunahre phuul se khilne lage
lab-ba-lab mausam-asar aisī duā rakhtā hai kaun

ek hī raat sahī phuul to khulte haiñ 'ḳhizāñ'
maut meñ kyā hai ki jiine kī tamannā na karo

tū ne banjar zamīñ ko phuul diye
mujh ko ik zaḳhm-e-dil-kushā hī de

ḳhaar kī zindagī-e-be-raunaq
phuul kī pāsbān hotī hai

jañgalī phuul kī tarah
qudratī husn liye

tum to kahte the ki rut kā jaadū
dasht meñ phuul khilā detā hai

tū ne jis kī jholī meñ do phuul bhī hans kar Daal diye
saarī umr vo kāġhaz par ḳhushbū kī lakīreñ khīñchtā hai

chūstā rahtā hai ras bhauñrā abhī tak dekh lo
phuul ne bhūle se kī thī sarparastī ek din

khil hī jā.egī kabhī dil kī kalī
phuul barsātā huā mausam chale

daaġh jitne bhī haiñ gulzār-e-tamannā meñ mere
phuul kī tarah unheñ terī nishānī likkhūñ

jab mirī sej pe hotā hai bahāroñ kā nuzūl
sirf ik phuul kivāḌoñ meñ khulā kartā hai

davā baġhair koī tifl mar gayā to kyā huā
bas ek phuul hī to thā bikhar gayā to kyā huā

ab ke bahār-e-husn-e-butāñ hai kamāl par
nāqūs ho na jaa.e kaf-e-barhaman meñ phuul

sūrat-e-sham.a tire sāmne raushan haiñ jo phuul
un kī kirnoñ meñ nahā zauq-e-samā.at pe na jā

apnī qismat ke hue saare sitāre patthar
phuul dāman meñ tire aur hamāre patthar

mo.ajiza ishq kā ye bhī hai zamāne vaalo
mere āñgan meñ hue phuul tumhāre patthar

qā.ede bāzār ke is baar ulTe ho ga.e
aap to aa.e nahīñ par phuul mahñge ho ga.e

is vaadī kā to dastūr nirālā hai
phuul saroñ par kañkar patthar Dhote haiñ

havā-e-aks-e-bahār-o-ḳhizāñ nahīñ hai faqat
agar nigāh karo phuul paat se aage