Tags-Phool

sahrā se ho ke baaġh meñ aayā huuñ sair ko
hāthoñ meñ phuul haiñ mire paañv meñ ret hai

shahr-e-tamannā meñ jā kar
kitne phuul khilātī huuñ

hañste phuul kahāñ haiñ merī qismat meñ
maiñ to bas murjhā.ī kaliyāñ chuntā huuñ

phuul kaliyāñ jis ke collar meñ sajā kar aa ga.ī
zindagī kī ketiyoñ ko be-samar us ne kiyā

phuul ḳhushbū rañg titlī isti.āre haiñ magar
mujh ko ye sab naam de kar mo'atabar us ne kiyā

phūl-numā ye ḳhaar haiñ yaaro
ye jo mire ġham-ḳhvār haiñ yaaro

vaqt kī sarsoñ phuul rahī hai
jism alag hai jaan alag hai

likhā thā ek taḳhtī par koī bhī phuul mat toḌe magar āñdhī to an-paḌh thī
so jab vo baaġh se guzrī koī ukhḌā koī TuuTā ḳhizāñ ke āḳhirī din the

sambhāle abr-e-karam tū sambhal bhī saktī hai
ye dil kī shāḳh abhī phūl-phal bhī saktī hai

vaqt baḌhtā rahā mausam mausam
na.ī rut aa.ī na.e phuul khile

ruḳh se Tapke jo qatr-hā-e-araq
phuul se dāman-e-sahar se gire

mahfil meñ pī jo phuul to is ehtiyāt se
mīnā-e-mai ne bū na kabhī dī sharāb kī

jalva hai usī kā sab gulshan meñ zamāne ke
gul phuul ko hai un ne parda sā banā rakhā

jāntā huuñ kyuuñ tumhāre baaġh meñ khilte haiñ phuul
baat mehnat kī nahīñ ye mojaza paanī kā hai

zaḳhm haiñ dil pe kyā kyā na dekho
phuul chun lo lab-e-naġhmagar se

phuul kāḌhe haiñ mire talvoñ pe vahshat ne mirī
tapte sahrā ne mujhe ābla-pā.ī nahīñ dī

tū phuul kī mānind na shabnam kī tarah aa
ab ke kisī be-nām se mausam kī tarah aa

phuul se itnā rabt baḌhānā Thiik nahīñ
qatra-e-shabnam uḌte uḌte kahtā hai

yuuñ baaġh koī ham ne ujaḌtā nahīñ dekhā
muddat se kisī phuul kā chehra nahīñ dekhā

dushman-e-jāñ nafas nafas merā
dhuul kā phuul huuñ kidhar jā.ūñ