Tags-Poverty

maiñ ne jab vādī-e-ġhurbat meñ qadam rakkhā thā
duur tak yād-e-vatan aa.ī thī samjhāne ko

ye hai 'sīmāb' ik nā-gufta ba-afsāna kyā kahiye
vatan se kunj-e-ġhurbat meñ chale aane pe kyā guzrī

ġhurbat se mirī sub.h o masā khelne vaale
terā bhī divālā jo khisak jaa.e to kyā ho

bhaTak rahā huuñ maiñ sadiyoñ se dasht-e-ġhurbat meñ
koī to mujh ko batā.e kahāñ mirā ghar hai

āzurda thī ġhurbat meñ mire dost kī hijrat
kuchh maiñ bhī pareshāñ huuñ arab DhūñD rahā huuñ

ġhurbat meñ vatan aur ahl-e-vatan kī yaad jab aa jaatī hai mujhe
dil hai ki taḌaptā rahtā hai aur ashk bhī Dhalte rahte haiñ

karte kis muñh se ho ġhurbat kī shikāyat 'ġhālib'
tum ko be-mehri-e-yārān-e-vatan yaad nahīñ

imārat ho ki ġhurbat boltī hai
ba-har-sūrat sharāfat boltī hai

yaad aane lagī yārān-e-vatan kī sohbat
dasht-e-ġhurbat meñ hai allāh nigahbāñ apnā

ain ġhurbat meñ nikhartā hai ḳhudī kā jauhar
naḳhl-e-ausāf lahū pī ke harā hotā hai

fikr ġhurbat kī mire pīchhe paḌī ho jaise
chain se luqma nigalne nahīñ detī mujh ko

yuuñ akelā dasht-e-ġhurbat meñ dil-e-nākām thā
pīchhe pīchhe maut thī aage ḳhudā kā naam thā

ġhurbat kī sub.h meñ bhī nahīñ hai vo raushnī
jo raushnī ki shām-e-savād-e-vatan meñ thī

aarzū hī na rahī sub.h-e-vatan kī mujh ko
shām-e-ġhurbat hai ajab vaqt suhānā terā

aa ki ġhurbat-kada-e-dahr meñ jī bahlā.eñ
ai dil us jalva-gah-e-nāz meñ kyā rakkhā hai

kaun sūd-o-ziyāñ kī duniyā meñ
dard ġhurbat kā saath detā hai

maiñ aisā sar huuñ jo dasht-e-ġhurbat meñ kaT gayā thā
maiñ sar-burīda shahīd lāshoñ meñ rah chukā huuñ

dil thā udaas ālam-e-ġhurbat kī shaam thī
kyā vaqt thā ki tum se mulāqāt ho ga.ī

rañj-e-ġhurbat ke sivā jabr ke pahlū bhī to haiñ
jo Tapakte nahīñ āñkhoñ se vo aañsū bhī to haiñ