Tags-Qismat

tum achchhe ġhair achchhā ġhair kī taqdīr bhī achchhī
ye āḳhir zikr kyuuñ hai merī qismat kī burā.ī kā

merī mahrūmī-e-qismat ko jo sun paatā raqīb
utnī hī baat kā afsāna banāyā hotā

ās.māñ kī vus.at meñ jaane ab kahāñ hogā
vo jo merī qismat kā be-ḳhabar sitārā hai

roz mai-ḳhvāroñ kī qismat ke sitāre shaam se
jagmagā uThte haiñ jaag uThte haiñ mai-ḳhānoñ ke saath

terī qismat hī meñ zāhid mai nahīñ
shukr to majbūriyoñ kā naam hai

hai jo qismat meñ vahī hogā na kuchh kam na sivā
aarzū kahte haiñ kis chiiz ko hasrat kaisī

ka.abe se but-ḳhāna meñ aa hī ga.e
khīñch laa.ī 'shauq' qismat dekhnā

daad mahjūrī kī phir hai justujū
de na dhokā apnī qismat dekhnā

kyā terā kyā merā ḳhvāb
jis kī qismat is kā ḳhvāb

chāhā thā tujh ko paañv meñ qismat se jiit kar
qismat se mil ga.e ho so Thukrā rahā huuñ maiñ

'tāriq' terī qismat meñ hī pyaar nahīñ
is bairī ke bair bhī khaTTe nikleñge

apnī qismat meñ mai-e-sāf to saaqī ma.alūm
kaash pheñke tū idhar durd-e-tah-e-jām kahīñ

maiñ koī haath bhī thāmūñ to ye dil thamtā hai
mujh se qismat ke sitāre nahīñ dekhe jaate

fikr anjām-e-mohabbat kī hai tauhīn ai 'lais'
vahī hogā mirī qismat meñ jo likkhā hogā

kyā jāniye kin logoñ kī qismat meñ huuñ 'ārif'
vo phal jo abhī shāḳh-e-shajar tak nahīñ pahuñche

baabā bolā merī qismat achchhī hai
us ne shāyad haath tumhārā dekhā hai

kahāñ kā shaġhl ab to daur hai ḳhūñ-nāba-e-ġham kā
vahī qismat meñ thī jo pī chuke aglī bahāroñ meñ

saarā ġham merī hī qismat meñ likhā hai 'saifī'
dil mirā 'mīr' kā dīvān huā jaatā hai

ek tannūr se sho.ale uTThā kiye aag jaltī rahī log taapā kiye
duur baiThe vo pahlū bachāyā kiye jin kī qismat meñ koī sharārā na thā

'saudā' churā chukā hī thā gulshan meñ gul ko maiñ
qismat ko apnī kyā kahūñ pattā khaḌak gayā