Tags-Qismat

merī qismat hī meñ likkhī thī tabāhī ai dost
hai shikāyat mujhe apne kī na begāne kī

haif kyuuñ qismat-e-shā.er pe na aa.e 'ājiz'
kal bhī kam-baḳht rahā marsiyāñ-ḳhvāñ aaj bhī hai

ai qāsid-e-ashk o paik-e-sabā us tak na payām-o-ḳhat pahuñchā
tum kyā karo haañ qismat kā likhā ye bhī na huā vo bhī na huā

qismat meñ agar judā.iyāñ haiñ
phir kyuuñ tirī yādeñ ā.iyāñ haiñ

jis kī qismat meñ ho sāhil pe pahuñchnā us ko
ek tinke kā sahārā bhī bachā saktā hai

bāġh-e-firdaus kī lorī maiñ sunātā kaise?
mirī qismat meñ thī āshufta-bayānī likkhī

ham insānoñ ko phir jiine kā maqsad hī nahīñ miltā
likhā hotā jo us ne sab kī hī qismat meñ ḳhush rahnā

hamārā kalba-e-ahzāñ hai ham haiñ yā kitābeñ haiñ
rahā baaqī na koī ham-nashīñ ab apnī qismat kā

mere havās-e-ishq meñ kyā kam haiñ muntashir
majnūñ kā naam ho gayā qismat kī baat hai

tum kyā karo qismat hī agar apnī burī ho
taqdīr ke likkhe ko miTātā nahīñ koī

kisī ko rashk aa.e kyuuñ na qismat par hamārī ab
ujaḌ aa.e haiñ har jānib se basnā rah gayā baaqī

har aadmī kī qismat meñ
ek na ek sazā hotī hai

kaun dekhegā haath par qismat
bas lakīroñ kā jaal lagtā hai

sāda-rūī ne to khoyā dil o diiñ se dekheñ
ḳhat ke aane meñ hai qismat kā likhā kyā kyā kuchh

āsmāñ ai āsmāñ kyā merī qismat meñ nahīñ
us nigah meñ ḳhvāhishoñ kī aag jalte dekhnā

ḳhush-qismat haiñ log vo jin ko pyaar ke badle pyaar milā
is duniyā meñ har insāñ ko hāsil ye sauġhāt nahīñ

mujhe qismat pe apnī hai bharosa
milā jo us pe raazī ho ga.ī huuñ

vo bhalā pech nikāleñge mirī qismat ke
apne bāloñ ke to bal un se nikāle na ga.e