Tags-Qismat

zahe qismat agar hazrat ḳhud apnā jā.eza bhī leñ
hamārī zindagī par tiir barsāne se kyā hogā

nazar-e-iltifāt ban ga.ī maut
mirī qismat ko aap kyā kiije

mar ga.e ham to sabā laa.ī javāb-e-nāma
vahī hotā hai jo qismat meñ likhā hotā hai

laakh qismat meñ ġharīb-ul-vatanī ho 'rahbar'
khīñch laatī hai magar phir bhī mohabbat ghar kī

kyuuñ bigaḌte ho kisī se 'ālim'
apnī qismat kī burā.ī dekho

mahfil-e-yār talak pahuñchāyā
merī qismat kī rasā.ī dekho

charke vo diye dil ko mahrūmī-e-qismat ne
ab hijr bhī tanhā.ī aur vasl bhī tanhā.ī

tum kabhī mā.il-e-karam na hue
merī qismat ke duur ġham na hue

kahāñ se kahāñ laa.ī qismat mirī
kis aafat meñ maiñ mubtalā ho gayā

har nafas marsiya thā sā.at-e-bedārī kā
laakh soī huī qismat ko pukārā ham ne

jaate hī un ke ziist kī sūrat badal ga.ī
allāh itnī der meñ qismat badal ga.ī

taqsīm tum mutābiq-e-mehnat na kar sake
taslīm ham mutābiq-e-qismat na kar sake

pahuñch saktā nahīñ vo apnī manzil pe kisī sūrat
vo bad-qismat musāfir jis meñ kuchh dam-ḳham nahīñ hotā

zahe-qismat ḳhudā ne zabt kī tāqat mujhe dī hai
haqīqat meñ mirā ashkoñ se dāman nam nahīñ hotā

jaan par aa banī hai kyā kahiye
apnī qismat burī hai kyā kahiye

kārgar kaun rahā kār-e-vafā meñ 'ḳhālid'
kis kī qismat meñ hai farhād kā tesha honā

nāzāñ hai jo apnī qismat par gulchīñ ko ye kyā ma.alūm nahīñ
jā.egī bahār aa.egī ḳhizāñ badlegā zamāna phūloñ kā

kahāñ tak ro.uuñ us ke ḳheme ke pīchhe qayāmat hai
mirī qismat meñ yā-rab kyā na thī dīvār patthar kī

vā-e-qismat ki bekasī bhī 'riyāz'
ab mirī qabr par nahīñ aatī

qismat-e-'tarzī' yahī jāgīr thī
shahr-e-ġham kahiye ki vīrāne kā ghar