Tags-Qismat

us bazm-e-tarab meñ hañsne par majbūr hameñ qismat ne kiyā
phūloñ se jahāñ sho.ale lapkeñ sāġhar meñ ghule hiire kī kanī

sho.aloñ meñ nikharte haiñ jauhar qismat pe 'farīdī' tanz na kar
ġham aisī hī ne.amat hai jis ko paate haiñ yahāñ qismat ke dhanī

tū kaash mile mujh ko akelī to batā.ūñ
suljhe mirī qismat kī pahelī to batā.ūñ

chashm-e-sāqī pur-tabassum mai-kadā bahkā huā
aao qismat ko harīf-e-kahkashāñ karte chalo

merī qismat se khelne vaale
mujh ko qismat se be-ḳhabar kar de

qismat kī kyā shikāyat taqdīr kā gilā kyā
jitnī burā.iyāñ haiñ dil kī burā.iyāñ haiñ

ab jo ghaTtā hai ghaTe tūfān-e-ashk
apnī qismat kā likhā maiñ dho chukā

qismat hī meñ raushnī nahīñ thī
bādal to kabhī kā chhaT rahā thā

merī qismat meñ mohabbat ne yahī likkhā hai
dard bhī dil meñ rahe zaḳhm-e-jigar kī sūrat

vo ek jaam kahāñ har kisī kī qismat meñ
vo ek zarf ki e.ajāz-e-sam ko pahchāne

aisā bhī koī din mirī qismat meñ hai 'fānī'
jis din mujhe marne kī tamannā na rahegī

jin kī dard-bharī bātoñ se ek zamāna raam huā
'qāsir' aise fan-kāroñ kī qismat meñ ban-bās rahā

ḳhūbī-e-qismat-e-qāsid dekho
paas us shoḳh ke kyā jā baiThā

ġham hare kartī hai fasl-e-ashk-bār-e-barshgāl
misl-e-qismat taar haiñ lail-o-nahār-e-barshgāl

hālāt pe mauqūf nahīñ apnī tabāhī
qismat kā likhā bhī to sañvarne nahīñ detā

aap dāman ko sitāroñ se sajā.e rakhiye
merī qismat meñ to patthar ke sivā kuchh bhī nahīñ

lā.eñgī rañg lā.eñgī aa.heñ mirī rā.egāñ hī na jā.eñgī aa.heñ mirī
merī qismat to sañvre na sañvre magar zulf to us parī kī sañvar jā.egī

na jaane kaun sī manzil hai merī qismat meñ
na jaane kaun sī manzil abhī bhī raah meñ hai

ḳhushī merī gavāra thī na qismat ko na duniyā ko
so maiñ kuchh ġham barā-e-ḳhātir-e-ahbāb uThā laa.ī

na hogā farq nuqte kā milā kar dekh le koī
mire āmāl-nāme se navishta merī qismat kā