Tags-Qismat

mere pahlū meñ hamesha rahī sūrat achchhī
maiñ bhī achchhā mirī qismat bhī nihāyat achchhī

sun ke ash.ār mire sab yahī kahte haiñ 'riyāz'
is kī qismat hai burī aur tabī.at achchhī

haath aa.e hai kyā ḳhaak tire ḳhāk-e-kaf-e-pā
jab tak ki na qismat meñ ho iksīr kisī kī

humā se bach ke mujh majnūñ ko daulat ishq kī ho jo
sag-e-lailā kī qismat hoñge mere ustuḳhāñ dekheñ

Thukrā ke chale jabīñ ko merī
qismat kī likhī ne yāvarī kī

apnī qismat ke jo mālik haiñ ye un se pūchho
rabt tadbīr ko hotā hai jo taqdīr ke saath

koī hunar koī qismat nahīñ chalī bhā.ī!
bane haiñ kaam mire haañ meñ haañ milāne se

merī qismat meñ mohabbat kā sitāra hī nahīñ
merī qismat meñ jafāoñ kā shajar rakkhā thā

zahe nasīb meñ qurbān apnī qismat ke
tire liye mirī duniyā tamām hotī hai

qismat muqaddar buujh kar ġhaflat meñ aa kar hirs se
phir kyā hai phirnā dar-ba-dar koī kuchh kaho koī kuchh kaho

apnī nākām mohabbat pe hañsī aatī hai
dil kī bigḌī huī qismat pe hañsī aatī hai

terī qismat meñ tahī-dāmāñ hī rahnā thā 'qadīr'
varna us ne anjuman meñ phuul barsā.e bahut

abhī tak na badlī mohabbat kī qismat
abhī tak mohabbat meñ hai be-qarārī

haa.e us mard kī qismat jo huā dil kā sharīk
haa.e us dil kā muqaddar jo banā dil merā

mirī qismat kī kashtī bahr-e-ġham meñ Duub saktī thī
tirī taqdīr se shāyad mirī taqdīr ubhrī hai

dī jaan ek huur ke bose kī chaaT par
qismat ne mujh ko zahr diyā hai bahisht meñ

mere chehre par ḳharāsheñ haiñ lakīreñ haath kī
merī qismat paḌhne vaale merā chehrā dekh kar

vāh-re shāne kī qismat kis ko ye ma.alūm thā
panja-e-shal se khuleñge uqda-hā-e-mū-e-dost

ye jiinā bhī kyā jiinā hai sar phoḌnā Thahrā
qismat ko hai jab vāsta patthar ke sanam se

yahī ik moḌ tak aanā bichhaḌnā
yahī qismat tumhārī bhī mirī bhī