Tags-Qismat

ye qismat huā vasl bhī gar nasīb
to ranjish bhī har baat par ho ga.ī

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

sotī qismat jāgte insāñ ujḌī bastī sham-e-farozāñ
jhūTe qisse ulTī tohmat baat kā banñā kyā nahīñ dekhā

aisā nahīñ duāoñ meñ māñgā nahīñ tujhe
qismat meñ hī nahīñ thā jo paayā nahīñ tujhe

kisī ke bas meñ nahīñ hai kushād-e-qalb-o-nigāh
milā thā apnī hī qismat kā sā.ebāñ mujh ko

manzūr thī ye shakl tajallī ko nuur kī
qismat khulī tire qad-o-ruḳh se zuhūr kī

kyuuñ kahiye kisī se ki hameñ koī pilā.e
qismat meñ agar mai nahīñ mil jā.egī chaa.e

kis kī ḳhushbū se mahak uTThīñ mirī tanhā.iyāñ
kis ne vīrāne meñ qismat kā tamāshā likh diyā

jazba-e-dard-e-mohabbat ne agar saath diyā
baat ban jā.egī qismat ne agar saath diyā

merī qismat hai ye āvāra-ḳhirāmī 'sājid'
dasht ko raah nikaltī hai na ghar aatā hai

har taraf chhā ga.e paiġhām-e-mohabbat ban kar
mujh se achchhī rahī qismat mere afsānoñ kī

ye kaisā insāf hai yārab kaisā khel hai qismat kā
kuchh hāthoñ meñ rañg-e-hinā hai kuchh meñ sirf lakīreñ haiñ

chāñd sī shakl jo allāh ne dī thī tum ko
kaash raushan mirī qismat kā sitārā karte

miTtā nahīñ navishta-e-qismat kisī tarah
patthar se sar ko phoḌ ki zaanū pe maar haath

maiñ kuchh nahīñ apne giit kā apnī maut kā nāma-bar huuñ
aksar zamīñ kī qismat meñ jitnī zardī hai vo huuñ lekin hazār qīmat

merī sūrat banī to ḳhaak banī
qismat ai sūrat-āfrīñ bantī

qismat kī ḳharābī hai ki jaatā huuñ ġhalat samt
paḌtā hai bayābān bayābān se aage

qismat ne aah ham ko ye din bhī dikhā diye
qismat pe e'tibār kiyā haa.e kyā kiyā

is dil-e-betāb ko taskīn āḳhir kaun de
is kī qismat meñ tahammul ke sivā kuchh bhī nahīñ

asbāb to paidā bhī hue the magar ab ke
us shoḳh se milnā mirī qismat meñ nahīñ thā