Tags-Qismat

pichhlī raat ke qahr se pahle kī hai baat jamāl
apnī jholī meñ the chand sitāre qismat vaale

ḳhud ko minnat-kash-e-qismat na karo dīda-varo
gulshan-e-shauq ugānā hai tumheñ ātish meñ

qismat
pakkī parchī to

bhaTaknā jab merī qismat meñ shāmil
pata sahrāoñ kā phir pūchhnā kyā

apnī qismat meñ kahāñ raqs-e-sharar kā manzar
sham-e-jāñ bujh ga.ī dāman kī havā se pahle

ek tausī.a jo qismat kī lakīroñ meñ rahe
ek tambīh jo bedār zamīroñ meñ rahe

likhā hai go terī qismat meñ 'shaukat' chashm-e-tar rakhnā
magar zālim kisī kī aabrū par bhī nazar rakhnā

āshiq-e-haq haiñ hamīñ shikva-e-taqdīr nahīñ
pech-e-qismat kā kam-az-zulf-e-girah-gīr nahīñ

maiñ is jahān kī qismat badalne niklā thā
aur apne haath kā likkhā hī phaaḌ aayā huuñ

ab jo rote ho apnī qismat par
maiñ na kahtā thā mat karo logo

aa hī jā.egā koī qismat kā maarā qais bhī
har taraf umm-e-ruḳh-e-lailā bichhāte jā.iye

vo mahrūm-e-daulat huuñ bargashta qismat
uḌe ḳhaak ghar meñ jo hū barse bāhar

kahāñ maiñ huuñ aisā ki tū mehrbāñ ho kahāñ qismat aisī ki āsāñ ho mushkil
agar aur gāhak nahīñ koī terā to ai ḳhanjar-e-nāz mere gale paḌ

pardes meñ rah kar koī kyā paañv jamā.e
gamle meñ lage phuul kī qismat hī alag hai

hotā kabhī habīb jo bantā raqīb hai
qismat ke rañg dekhte rah jā.iye zarā

har paañv se uljhā huuñ kaTī Dor ke mānind
'tāriq' mirī qismat kī patañg jab se kaTī hai

jis se ban jaatī hai bigḌī huī qismat ai dost
aisī tadbīr bhī taqdīr se haath aatī hai

mujh ko qismat hī pahuñchne nahīñ detī varna
ek e.azāz hai us dar kā gadāgar honā

is ko qismat kī ḳharābī hī kahā jā.egā
aap kā shahr meñ aanā mirā bāhar honā

haiñ shām-e-ġhurbat kī tīrgī meñ mujhe mire ashk hī ġhanīmat
ho jin kī qismat meñ ḳhud hī gardish maiñ un sitāroñ kā kyā karūñgā