Tags-Qismat

haa.e us ek abr kī qismat
jis ke saa.e meñ āftāb aayā

vo bhalā pech nikāleñge mirī qismat ke
apne bāloñ ke to bal un se nikāle na ga.e

dil bhī qassam-e-azal ne vo diyā qismat se
jis ne duniyā meñ na rakkhā kisī qābil mujh ko

'shakīl' aa.ina hai daur-e-inqilāb magar
ma.āl-e-qismat-e-hindostāñ nahīñ ma.alūm

vaa.e qismat ki rahe log bhī us paas na vo
zikr laate the kisī Dhab se jo akasr apnā

jis zaḳhm kī ho saktī ho tadbīr rafū kī
likh dījiyo yā rab use qismat meñ adū kī

āshnā ġham se milā rāhat se begāna milā
dil bhī ham ko ḳhūbī-e-qismat se dīvāna milā

le jaa.e mujhe sū-e-chaman ab na bahārāñ
dil qismat-e-zindāñ kī qasam khaa.e hue hai

kis kā bhed kahāñ kī qismat pagle kis janjāl meñ hai
baazī hai ik sāda-kāġhaz saarā kartab chaal meñ hai

ab aur kitnā tamāsha banā.egī qismat
phirūñ maiñ apnā janāza kahāñ kahāñ le kar

bar aatī aarzū muddat pe mujh bargashta-kismat kī
bulāte apnī mahfil meñ agar tum rū-ba-rū mujh ko

ye qismat daaġh jis meñ dard jis meñ
vo dil ho luuT dast-e-nāznīñ par

ġham na aa.e tumhārī qismat meñ
gar nikālo zakāt ḳhushiyoñ kī

ḳhud ġhalat hai jo kahe hotī hai taqdīr ġhalat
kahīñ qismat kī bhī ho saktī hai tahrīr ġhalat

haif us chaar girah kapḌe kī qismat 'ġhālib'
jis kī qismat meñ ho āshiq kā girebāñ honā

dard-o-ġham ko bhī hai nasība shart
ye bhī qismat sivā nahīñ miltā

ye qismat ke farishte haiñ ye ḳhūbī hai muqaddar kī faqat
ḳhizar uTh jaa.eñ duniyā se raheñ ai 'nūh' ham baiThe

vo bad-nasīb hai jise aayā pasand tū
qismat to us kī hai jise tū ne kiyā pasand

ilāhī mujh par karam ho terā na khol a.amāl-nāma merā
pukārtā hai ye ḳhatt-e-qismat ki maiñ bhī fard-e-hisāb meñ huuñ

thī sitam-kārī qismat kī vo shiddat hamdam
tū bhī ranjīda rahā mujh se gilā ho ki na ho